Rig Veda · Chapter 9.100

abhī navante adruhaḥ priyam indrasya kāmyam |
vatsaṁ na pūrva āyuni jātaṁ rihanti mātaraḥ ||

punāna indav ā bhara soma dvibarhasaṁ rayim |
tvaṁ vasūni puṣyasi viśvāni dāśuṣo gṛhe ||

tvaṁ dhiyam manoyujaṁ sṛjā vṛṣṭiṁ na tanyatuḥ |
tvaṁ vasūni pārthivā divyā ca soma puṣyasi ||

pari te jigyuṣo yathā dhārā sutasya dhāvati |
raṁhamāṇā vy a1vyayaṁ vāraṁ vājīva sānasiḥ ||

kratve dakṣāya naḥ kave pavasva soma dhārayā |
indrāya pātave suto mitrāya varuṇāya ca ||

pavasva vājasātamaḥ pavitre dhārayā sutaḥ |
indrāya soma viṣṇave devebhyo madhumattamaḥ ||

tvāṁ rihanti mātaro harim pavitre adruhaḥ |
vatsaṁ jātaṁ na dhenavaḥ pavamāna vidharmaṇi ||

pavamāna mahi śravaś citrebhir yāsi raśmibhiḥ |
śardhan tamāṁsi jighnase viśvāni dāśuṣo gṛhe ||

tvaṁ dyāṁ ca mahivrata pṛthivīṁ cāti jabhriṣe |
prati drāpim amuñcathāḥ pavamāna mahitvanā ||