Rig Veda · Chapter 9.085

indrāya soma suṣutaḥ pari sravāpāmīvā bhavatu rakṣasā saha |
mā te rasasya matsata dvayāvino draviṇasvanta iha santv indavaḥ ||

asmān samarye pavamāna codaya dakṣo devānām asi hi priyo madaḥ |
jahi śatrūm̐r abhy ā bhandanāyataḥ pibendra somam ava no mṛdho jahi ||

adabdha indo pavase madintama ātmendrasya bhavasi dhāsir uttamaḥ |
abhi svaranti bahavo manīṣiṇo rājānam asya bhuvanasya niṁsate ||

sahasraṇīthaḥ śatadhāro adbhuta indrāyenduḥ pavate kāmyam madhu |
jayan kṣetram abhy arṣā jayann apa uruṁ no gātuṁ kṛṇu soma mīḍhvaḥ ||

kanikradat kalaśe gobhir ajyase vy a1vyayaṁ samayā vāram arṣasi |
marmṛjyamāno atyo na sānasir indrasya soma jaṭhare sam akṣaraḥ ||

svāduḥ pavasva divyāya janmane svādur indrāya suhavītunāmne |
svādur mitrāya varuṇāya vāyave bṛhaspataye madhumām̐ adābhyaḥ ||

atyam mṛjanti kalaśe daśa kṣipaḥ pra viprāṇām matayo vāca īrate |
pavamānā abhy arṣanti suṣṭutim endraṁ viśanti madirāsa indavaḥ ||

pavamāno abhy arṣā suvīryam urvīṁ gavyūtim mahi śarma saprathaḥ |
mākir no asya pariṣūtir īśatendo jayema tvayā dhanaṁ-dhanam ||

adhi dyām asthād vṛṣabho vicakṣaṇo 'rūrucad vi divo rocanā kaviḥ |
rājā pavitram aty eti roruvad divaḥ pīyūṣaṁ duhate nṛcakṣasaḥ ||

divo nāke madhujihvā asaścato venā duhanty ukṣaṇaṁ giriṣṭhām |
apsu drapsaṁ vāvṛdhānaṁ samudra ā sindhor ūrmā madhumantam pavitra ā ||

nāke suparṇam upapaptivāṁsaṁ giro venānām akṛpanta pūrvīḥ |
śiśuṁ rihanti matayaḥ panipnataṁ hiraṇyayaṁ śakunaṁ kṣāmaṇi sthām ||

ūrdhvo gandharvo adhi nāke asthād viśvā rūpā praticakṣāṇo asya |
bhānuḥ śukreṇa śociṣā vy adyaut prārūrucad rodasī mātarā śuciḥ ||