Rig Veda · Chapter 9.015

eṣa dhiyā yāty aṇvyā śūro rathebhir āśubhiḥ |
gacchann indrasya niṣkṛtam ||

eṣa purū dhiyāyate bṛhate devatātaye |
yatrāmṛtāsa āsate ||

eṣa hito vi nīyate 'ntaḥ śubhrāvatā pathā |
yadī tuñjanti bhūrṇayaḥ ||

eṣa śṛṅgāṇi dodhuvac chiśīte yūthyo3 vṛṣā |
nṛmṇā dadhāna ojasā ||

eṣa rukmibhir īyate vājī śubhrebhir aṁśubhiḥ |
patiḥ sindhūnām bhavan ||

eṣa vasūni pibdanā paruṣā yayivām̐ ati |
ava śādeṣu gacchati ||

etam mṛjanti marjyam upa droṇeṣv āyavaḥ |
pracakrāṇam mahīr iṣaḥ ||

etam u tyaṁ daśa kṣipo mṛjanti sapta dhītayaḥ |
svāyudham madintamam ||