Rig Veda · Chapter 8.102

tvam agne bṛhad vayo dadhāsi deva dāśuṣe |
kavir gṛhapatir yuvā ||

sa na īḻānayā saha devām̐ agne duvasyuvā |
cikid vibhānav ā vaha ||

tvayā ha svid yujā vayaṁ codiṣṭhena yaviṣṭhya |
abhi ṣmo vājasātaye ||

aurvabhṛguvac chucim apnavānavad ā huve |
agniṁ samudravāsasam ||

huve vātasvanaṁ kavim parjanyakrandyaṁ sahaḥ |
agniṁ samudravāsasam ||

ā savaṁ savitur yathā bhagasyeva bhujiṁ huve |
agniṁ samudravāsasam ||

agniṁ vo vṛdhantam adhvarāṇām purūtamam |
acchā naptre sahasvate ||

ayaṁ yathā na ābhuvat tvaṣṭā rūpeva takṣyā |
asya kratvā yaśasvataḥ ||

ayaṁ viśvā abhi śriyo 'gnir deveṣu patyate |
ā vājair upa no gamat ||

viśveṣām iha stuhi hotṝṇāṁ yaśastamam |
agniṁ yajñeṣu pūrvyam ||

śīram pāvakaśociṣaṁ jyeṣṭho yo dameṣv ā |
dīdāya dīrghaśruttamaḥ ||

tam arvantaṁ na sānasiṁ gṛṇīhi vipra śuṣmiṇam |
mitraṁ na yātayajjanam ||

upa tvā jāmayo giro dediśatīr haviṣkṛtaḥ |
vāyor anīke asthiran ||

yasya tridhātv avṛtam barhis tasthāv asaṁdinam |
āpaś cin ni dadhā padam ||

padaṁ devasya mīḻhuṣo 'nādhṛṣṭābhir ūtibhiḥ |
bhadrā sūrya ivopadṛk ||

agne ghṛtasya dhītibhis tepāno deva śociṣā |
ā devān vakṣi yakṣi ca ||

taṁ tvājananta mātaraḥ kaviṁ devāso aṅgiraḥ |
havyavāham amartyam ||

pracetasaṁ tvā kave 'gne dūtaṁ vareṇyam |
havyavāhaṁ ni ṣedire ||

nahi me asty aghnyā na svadhitir vananvati |
athaitādṛg bharāmi te ||

yad agne kāni kāni cid ā te dārūṇi dadhmasi |
tā juṣasva yaviṣṭhya ||

yad atty upajihvikā yad vamro atisarpati |
sarvaṁ tad astu te ghṛtam ||

agnim indhāno manasā dhiyaṁ saceta martyaḥ |
agnim īdhe vivasvabhiḥ ||