Rig Veda · Chapter 8.099

tvām idā hyo naro 'pīpyan vajrin bhūrṇayaḥ |
sa indra stomavāhasām iha śrudhy upa svasaram ā gahi ||

matsvā suśipra harivas tad īmahe tve ā bhūṣanti vedhasaḥ |
tava śravāṁsy upamāny ukthyā suteṣv indra girvaṇaḥ ||

śrāyanta iva sūryaṁ viśved indrasya bhakṣata |
vasūni jāte janamāna ojasā prati bhāgaṁ na dīdhima ||

anarśarātiṁ vasudām upa stuhi bhadrā indrasya rātayaḥ |
so asya kāmaṁ vidhato na roṣati mano dānāya codayan ||

tvam indra pratūrtiṣv abhi viśvā asi spṛdhaḥ |
aśastihā janitā viśvatūr asi tvaṁ tūrya taruṣyataḥ ||

anu te śuṣmaṁ turayantam īyatuḥ kṣoṇī śiśuṁ na mātarā |
viśvās te spṛdhaḥ śnathayanta manyave vṛtraṁ yad indra tūrvasi ||

ita ūtī vo ajaram prahetāram aprahitam |
āśuṁ jetāraṁ hetāraṁ rathītamam atūrtaṁ tugryāvṛdham ||

iṣkartāram aniṣkṛtaṁ sahaskṛtaṁ śatamūtiṁ śatakratum |
samānam indram avase havāmahe vasavānaṁ vasūjuvam ||