Rig Veda · Chapter 8.085
ā me havaṁ nāsatyāśvinā gacchataṁ yuvam |
madhvaḥ somasya pītaye ||
imam me stomam aśvinemam me śṛṇutaṁ havam |
madhvaḥ somasya pītaye ||
ayaṁ vāṁ kṛṣṇo aśvinā havate vājinīvasū |
madhvaḥ somasya pītaye ||
śṛṇutaṁ jaritur havaṁ kṛṣṇasya stuvato narā |
madhvaḥ somasya pītaye ||
chardir yantam adābhyaṁ viprāya stuvate narā |
madhvaḥ somasya pītaye ||
gacchataṁ dāśuṣo gṛham itthā stuvato aśvinā |
madhvaḥ somasya pītaye ||
yuñjāthāṁ rāsabhaṁ rathe vīḍvaṅge vṛṣaṇvasū |
madhvaḥ somasya pītaye ||
trivandhureṇa trivṛtā rathenā yātam aśvinā |
madhvaḥ somasya pītaye ||
nū me giro nāsatyāśvinā prāvataṁ yuvam |
madhvaḥ somasya pītaye ||
Original text: Ṛgveda-Saṃhitā · Edition: Theodor Aufrecht Die Hymnen des Rigveda. Mandala I-VI Bonn Mareus Theodor Aufrecht Die Hymnen des Rigveda. Mandala VII-X Bonn Mareus · Data entry Barend A. Van Nooten Gary B. Holland · GRETIL (Göttingen) · CC BY-NC-SA 4.0