Rig Veda · Chapter 8.079

ayaṁ kṛtnur agṛbhīto viśvajid udbhid it somaḥ |
ṛṣir vipraḥ kāvyena ||

abhy ūrṇoti yan nagnam bhiṣakti viśvaṁ yat turam |
prem andhaḥ khyan niḥ śroṇo bhūt ||

tvaṁ soma tanūkṛdbhyo dveṣobhyo 'nyakṛtebhyaḥ |
uru yantāsi varūtham ||

tvaṁ cittī tava dakṣair diva ā pṛthivyā ṛjīṣin |
yāvīr aghasya cid dveṣaḥ ||

arthino yanti ced arthaṁ gacchān id daduṣo rātim |
vavṛjyus tṛṣyataḥ kāmam ||

vidad yat pūrvyaṁ naṣṭam ud īm ṛtāyum īrayat |
prem āyus tārīd atīrṇam ||

suśevo no mṛḻayākur adṛptakratur avātaḥ |
bhavā naḥ soma śaṁ hṛde ||

mā naḥ soma saṁ vīvijo mā vi bībhiṣathā rājan |
mā no hārdi tviṣā vadhīḥ ||

ava yat sve sadhasthe devānāṁ durmatīr īkṣe |
rājann apa dviṣaḥ sedha mīḍhvo apa sridhaḥ sedha ||