Rig Veda · Chapter 8.077

jajñāno nu śatakratur vi pṛcchad iti mātaram |
ka ugrāḥ ke ha śṛṇvire ||

ād īṁ śavasy abravīd aurṇavābham ahīśuvam |
te putra santu niṣṭuraḥ ||

sam it tān vṛtrahākhidat khe arām̐ iva khedayā |
pravṛddho dasyuhābhavat ||

ekayā pratidhāpibat sākaṁ sarāṁsi triṁśatam |
indraḥ somasya kāṇukā ||

abhi gandharvam atṛṇad abudhneṣu rajaḥsv ā |
indro brahmabhya id vṛdhe ||

nir āvidhyad giribhya ā dhārayat pakvam odanam |
indro bundaṁ svātatam ||

śatabradhna iṣus tava sahasraparṇa eka it |
yam indra cakṛṣe yujam ||

tena stotṛbhya ā bhara nṛbhyo nāribhyo attave |
sadyo jāta ṛbhuṣṭhira ||

etā cyautnāni te kṛtā varṣiṣṭhāni parīṇasā |
hṛdā vīḍv adhārayaḥ ||

viśvet tā viṣṇur ābharad urukramas tveṣitaḥ |
śatam mahiṣān kṣīrapākam odanaṁ varāham indra emuṣam ||

tuvikṣaṁ te sukṛtaṁ sūmayaṁ dhanuḥ sādhur bundo hiraṇyayaḥ |
ubhā te bāhū raṇyā susaṁskṛta ṛdūpe cid ṛdūvṛdhā ||