Rig Veda · Chapter 8.054

etat ta indra vīryaṁ gīrbhir gṛṇanti kāravaḥ |
te stobhanta ūrjam āvan ghṛtaścutam paurāso nakṣan dhītibhiḥ ||

nakṣanta indram avase sukṛtyayā yeṣāṁ suteṣu mandase |
yathā saṁvarte amado yathā kṛśa evāsme indra matsva ||

ā no viśve sajoṣaso devāso gantanopa naḥ |
vasavo rudrā avase na ā gamañ chṛṇvantu maruto havam ||

pūṣā viṣṇur havanam me sarasvaty avantu sapta sindhavaḥ |
āpo vātaḥ parvatāso vanaspatiḥ śṛṇotu pṛthivī havam ||

yad indra rādho asti te māghonam maghavattama |
tena no bodhi sadhamādyo vṛdhe bhago dānāya vṛtrahan ||

ājipate nṛpate tvam id dhi no vāja ā vakṣi sukrato |
vītī hotrābhir uta devavītibhiḥ sasavāṁso vi śṛṇvire ||

santi hy a1rya āśiṣa indra āyur janānām |
asmān nakṣasva maghavann upāvase dhukṣasva pipyuṣīm iṣam ||

vayaṁ ta indra stomebhir vidhema tvam asmākaṁ śatakrato |
mahi sthūraṁ śaśayaṁ rādho ahrayam praskaṇvāya ni tośaya ||