Rig Veda · Chapter 8.051

yathā manau sāṁvaraṇau somam indrāpibaḥ sutam |
nīpātithau maghavan medhyātithau puṣṭigau śruṣṭigau sacā ||

pārṣadvāṇaḥ praskaṇvaṁ sam asādayac chayānaṁ jivrim uddhitam |
sahasrāṇy asiṣāsad gavām ṛṣis tvoto dasyave vṛkaḥ ||

ya ukthebhir na vindhate cikid ya ṛṣicodanaḥ |
indraṁ tam acchā vada navyasyā maty ariṣyantaṁ na bhojase ||

yasmā arkaṁ saptaśīrṣāṇam ānṛcus tridhātum uttame pade |
sa tv i1mā viśvā bhuvanāni cikradad ād ij janiṣṭa pauṁsyam ||

yo no dātā vasūnām indraṁ taṁ hūmahe vayam |
vidmā hy asya sumatiṁ navīyasīṁ gamema gomati vraje ||

yasmai tvaṁ vaso dānāya śikṣasi sa rāyas poṣam aśnute |
taṁ tvā vayam maghavann indra girvaṇaḥ sutāvanto havāmahe ||

kadā cana starīr asi nendra saścasi dāśuṣe |
upopen nu maghavan bhūya in nu te dānaṁ devasya pṛcyate ||

pra yo nanakṣe abhy ojasā kriviṁ vadhaiḥ śuṣṇaṁ nighoṣayan |
yaded astambhīt prathayann amūṁ divam ād ij janiṣṭa pārthivaḥ ||

yasyāyaṁ viśva āryo dāsaḥ śevadhipā ariḥ |
tiraś cid arye ruśame parīravi tubhyet so ajyate rayiḥ ||

turaṇyavo madhumantaṁ ghṛtaścutaṁ viprāso arkam ānṛcuḥ |
asme rayiḥ paprathe vṛṣṇyaṁ śavo 'sme suvānāsa indavaḥ ||