Rig Veda · Chapter 8.031

yo yajāti yajāta it sunavac ca pacāti ca |
brahmed indrasya cākanat ||

puroḻāśaṁ yo asmai somaṁ rarata āśiram |
pād it taṁ śakro aṁhasaḥ ||

tasya dyumām̐ asad ratho devajūtaḥ sa śūśuvat |
viśvā vanvann amitriyā ||

asya prajāvatī gṛhe 'saścantī dive-dive |
iḻā dhenumatī duhe ||

yā dampatī samanasā sunuta ā ca dhāvataḥ |
devāso nityayāśirā ||

prati prāśavyām̐ itaḥ samyañcā barhir āśāte |
na tā vājeṣu vāyataḥ ||

na devānām api hnutaḥ sumatiṁ na jugukṣataḥ |
śravo bṛhad vivāsataḥ ||

putriṇā tā kumāriṇā viśvam āyur vy aśnutaḥ |
ubhā hiraṇyapeśasā ||

vītihotrā kṛtadvasū daśasyantāmṛtāya kam |
sam ūdho romaśaṁ hato deveṣu kṛṇuto duvaḥ ||

ā śarma parvatānāṁ vṛṇīmahe nadīnām |
ā viṣṇoḥ sacābhuvaḥ ||

aitu pūṣā rayir bhagaḥ svasti sarvadhātamaḥ |
urur adhvā svastaye ||

aramatir anarvaṇo viśvo devasya manasā |
ādityānām aneha it ||

yathā no mitro aryamā varuṇaḥ santi gopāḥ |
sugā ṛtasya panthāḥ ||

agniṁ vaḥ pūrvyaṁ girā devam īḻe vasūnām |
saparyantaḥ purupriyam mitraṁ na kṣetrasādhasam ||

makṣū devavato rathaḥ śūro vā pṛtsu kāsu cit |
devānāṁ ya in mano yajamāna iyakṣaty abhīd ayajvano bhuvat ||

na yajamāna riṣyasi na sunvāna na devayo |
devānāṁ ya in mano yajamāna iyakṣaty abhīd ayajvano bhuvat ||

nakiṣ ṭaṁ karmaṇā naśan na pra yoṣan na yoṣati |
devānāṁ ya in mano yajamāna iyakṣaty abhīd ayajvano bhuvat ||

asad atra suvīryam uta tyad āśvaśvyam |
devānāṁ ya in mano yajamāna iyakṣaty abhīd ayajvano bhuvat ||