Rig Veda · Chapter 8.015

tam v abhi pra gāyata puruhūtam puruṣṭutam |
indraṁ gīrbhis taviṣam ā vivāsata ||

yasya dvibarhaso bṛhat saho dādhāra rodasī |
girīm̐r ajrām̐ apaḥ svar vṛṣatvanā ||

sa rājasi puruṣṭutam̐ eko vṛtrāṇi jighnase |
indra jaitrā śravasyā ca yantave ||

taṁ te madaṁ gṛṇīmasi vṛṣaṇam pṛtsu sāsahim |
u lokakṛtnum adrivo hariśriyam ||

yena jyotīṁṣy āyave manave ca viveditha |
mandāno asya barhiṣo vi rājasi ||

tad adyā cit ta ukthino 'nu ṣṭuvanti pūrvathā |
vṛṣapatnīr apo jayā dive-dive ||

tava tyad indriyam bṛhat tava śuṣmam uta kratum |
vajraṁ śiśāti dhiṣaṇā vareṇyam ||

tava dyaur indra pauṁsyam pṛthivī vardhati śravaḥ |
tvām āpaḥ parvatāsaś ca hinvire ||

tvāṁ viṣṇur bṛhan kṣayo mitro gṛṇāti varuṇaḥ |
tvāṁ śardho madaty anu mārutam ||

tvaṁ vṛṣā janānām maṁhiṣṭha indra jajñiṣe |
satrā viśvā svapatyāni dadhiṣe ||

satrā tvam puruṣṭutam̐ eko vṛtrāṇi tośase |
nānya indrāt karaṇam bhūya invati ||

yad indra manmaśas tvā nānā havanta ūtaye |
asmākebhir nṛbhir atrā svar jaya ||

araṁ kṣayāya no mahe viśvā rūpāṇy āviśan |
indraṁ jaitrāya harṣayā śacīpatim ||