Rig Veda · Chapter 8.012

ya indra somapātamo madaḥ śaviṣṭha cetati |
yenā haṁsi ny a1triṇaṁ tam īmahe ||

yenā daśagvam adhriguṁ vepayantaṁ svarṇaram |
yenā samudram āvithā tam īmahe ||

yena sindhum mahīr apo rathām̐ iva pracodayaḥ |
panthām ṛtasya yātave tam īmahe ||

imaṁ stomam abhiṣṭaye ghṛtaṁ na pūtam adrivaḥ |
yenā nu sadya ojasā vavakṣitha ||

imaṁ juṣasva girvaṇaḥ samudra iva pinvate |
indra viśvābhir ūtibhir vavakṣitha ||

yo no devaḥ parāvataḥ sakhitvanāya māmahe |
divo na vṛṣṭim prathayan vavakṣitha ||

vavakṣur asya ketava uta vajro gabhastyoḥ |
yat sūryo na rodasī avardhayat ||

yadi pravṛddha satpate sahasram mahiṣām̐ aghaḥ |
ād it ta indriyam mahi pra vāvṛdhe ||

indraḥ sūryasya raśmibhir ny arśasānam oṣati |
agnir vaneva sāsahiḥ pra vāvṛdhe ||

iyaṁ ta ṛtviyāvatī dhītir eti navīyasī |
saparyantī purupriyā mimīta it ||

garbho yajñasya devayuḥ kratum punīta ānuṣak |
stomair indrasya vāvṛdhe mimīta it ||

sanir mitrasya papratha indraḥ somasya pītaye |
prācī vāśīva sunvate mimīta it ||

yaṁ viprā ukthavāhaso 'bhipramandur āyavaḥ |
ghṛtaṁ na pipya āsany ṛtasya yat ||

uta svarāje aditiḥ stomam indrāya jījanat |
purupraśastam ūtaya ṛtasya yat ||

abhi vahnaya ūtaye 'nūṣata praśastaye |
na deva vivratā harī ṛtasya yat ||

yat somam indra viṣṇavi yad vā gha trita āptye |
yad vā marutsu mandase sam indubhiḥ ||

yad vā śakra parāvati samudre adhi mandase |
asmākam it sute raṇā sam indubhiḥ ||

yad vāsi sunvato vṛdho yajamānasya satpate |
ukthe vā yasya raṇyasi sam indubhiḥ ||

devaṁ-devaṁ vo 'vasa indram-indraṁ gṛṇīṣaṇi |
adhā yajñāya turvaṇe vy ānaśuḥ ||

yajñebhir yajñavāhasaṁ somebhiḥ somapātamam |
hotrābhir indraṁ vāvṛdhur vy ānaśuḥ ||

mahīr asya praṇītayaḥ pūrvīr uta praśastayaḥ |
viśvā vasūni dāśuṣe vy ānaśuḥ ||

indraṁ vṛtrāya hantave devāso dadhire puraḥ |
indraṁ vāṇīr anūṣatā sam ojase ||

mahāntam mahinā vayaṁ stomebhir havanaśrutam |
arkair abhi pra ṇonumaḥ sam ojase ||

na yaṁ vivikto rodasī nāntarikṣāṇi vajriṇam |
amād id asya titviṣe sam ojasaḥ ||

yad indra pṛtanājye devās tvā dadhire puraḥ |
ād it te haryatā harī vavakṣatuḥ ||

yadā vṛtraṁ nadīvṛtaṁ śavasā vajrinn avadhīḥ |
ād it te haryatā harī vavakṣatuḥ ||

yadā te viṣṇur ojasā trīṇi padā vicakrame |
ād it te haryatā harī vavakṣatuḥ ||

yadā te haryatā harī vāvṛdhāte dive-dive |
ād it te viśvā bhuvanāni yemire ||

yadā te mārutīr viśas tubhyam indra niyemire |
ād it te viśvā bhuvanāni yemire ||

yadā sūryam amuṁ divi śukraṁ jyotir adhārayaḥ |
ād it te viśvā bhuvanāni yemire ||

imāṁ ta indra suṣṭutiṁ vipra iyarti dhītibhiḥ |
jāmim padeva pipratīm prādhvare ||

yad asya dhāmani priye samīcīnāso asvaran |
nābhā yajñasya dohanā prādhvare ||

suvīryaṁ svaśvyaṁ sugavyam indra daddhi naḥ |
hoteva pūrvacittaye prādhvare ||