Rig Veda · Chapter 8.006

mahām̐ indro ya ojasā parjanyo vṛṣṭimām̐ iva |
stomair vatsasya vāvṛdhe ||

prajām ṛtasya piprataḥ pra yad bharanta vahnayaḥ |
viprā ṛtasya vāhasā ||

kaṇvā indraṁ yad akrata stomair yajñasya sādhanam |
jāmi bruvata āyudham ||

sam asya manyave viśo viśvā namanta kṛṣṭayaḥ |
samudrāyeva sindhavaḥ ||

ojas tad asya titviṣa ubhe yat samavartayat |
indraś carmeva rodasī ||

vi cid vṛtrasya dodhato vajreṇa śataparvaṇā |
śiro bibheda vṛṣṇinā ||

imā abhi pra ṇonumo vipām agreṣu dhītayaḥ |
agneḥ śocir na didyutaḥ ||

guhā satīr upa tmanā pra yac chocanta dhītayaḥ |
kaṇvā ṛtasya dhārayā ||

pra tam indra naśīmahi rayiṁ gomantam aśvinam |
pra brahma pūrvacittaye ||

aham id dhi pituṣ pari medhām ṛtasya jagrabha |
ahaṁ sūrya ivājani ||

aham pratnena manmanā giraḥ śumbhāmi kaṇvavat |
yenendraḥ śuṣmam id dadhe ||

ye tvām indra na tuṣṭuvur ṛṣayo ye ca tuṣṭuvuḥ |
mamed vardhasva suṣṭutaḥ ||

yad asya manyur adhvanīd vi vṛtram parvaśo rujan |
apaḥ samudram airayat ||

ni śuṣṇa indra dharṇasiṁ vajraṁ jaghantha dasyavi |
vṛṣā hy ugra śṛṇviṣe ||

na dyāva indram ojasā nāntarikṣāṇi vajriṇam |
na vivyacanta bhūmayaḥ ||

yas ta indra mahīr apaḥ stabhūyamāna āśayat |
ni tam padyāsu śiśnathaḥ ||

ya ime rodasī mahī samīcī samajagrabhīt |
tamobhir indra taṁ guhaḥ ||

ya indra yatayas tvā bhṛgavo ye ca tuṣṭuvuḥ |
mamed ugra śrudhī havam ||

imās ta indra pṛśnayo ghṛtaṁ duhata āśiram |
enām ṛtasya pipyuṣīḥ ||

yā indra prasvas tvāsā garbham acakriran |
pari dharmeva sūryam ||

tvām ic chavasas pate kaṇvā ukthena vāvṛdhuḥ |
tvāṁ sutāsa indavaḥ ||

taved indra praṇītiṣūta praśastir adrivaḥ |
yajño vitantasāyyaḥ ||

ā na indra mahīm iṣam puraṁ na darṣi gomatīm |
uta prajāṁ suvīryam ||

uta tyad āśvaśvyaṁ yad indra nāhuṣīṣv ā |
agre vikṣu pradīdayat ||

abhi vrajaṁ na tatniṣe sūra upākacakṣasam |
yad indra mṛḻayāsi naḥ ||

yad aṅga taviṣīyasa indra prarājasi kṣitīḥ |
mahām̐ apāra ojasā ||

taṁ tvā haviṣmatīr viśa upa bruvata ūtaye |
urujrayasam indubhiḥ ||

upahvare girīṇāṁ saṁgathe ca nadīnām |
dhiyā vipro ajāyata ||

ataḥ samudram udvataś cikitvām̐ ava paśyati |
yato vipāna ejati ||

ād it pratnasya retaso jyotiṣ paśyanti vāsaram |
paro yad idhyate divā ||

kaṇvāsa indra te matiṁ viśve vardhanti pauṁsyam |
uto śaviṣṭha vṛṣṇyam ||

imām ma indra suṣṭutiṁ juṣasva pra su mām ava |
uta pra vardhayā matim ||

uta brahmaṇyā vayaṁ tubhyam pravṛddha vajrivaḥ |
viprā atakṣma jīvase ||

abhi kaṇvā anūṣatāpo na pravatā yatīḥ |
indraṁ vananvatī matiḥ ||

indram ukthāni vāvṛdhuḥ samudram iva sindhavaḥ |
anuttamanyum ajaram ||

ā no yāhi parāvato haribhyāṁ haryatābhyām |
imam indra sutam piba ||

tvām id vṛtrahantama janāso vṛktabarhiṣaḥ |
havante vājasātaye ||

anu tvā rodasī ubhe cakraṁ na varty etaśam |
anu suvānāsa indavaḥ ||

mandasvā su svarṇara utendra śaryaṇāvati |
matsvā vivasvato matī ||

vāvṛdhāna upa dyavi vṛṣā vajry aroravīt |
vṛtrahā somapātamaḥ ||

ṛṣir hi pūrvajā asy eka īśāna ojasā |
indra coṣkūyase vasu ||

asmākaṁ tvā sutām̐ upa vītapṛṣṭhā abhi prayaḥ |
śataṁ vahantu harayaḥ ||

imāṁ su pūrvyāṁ dhiyam madhor ghṛtasya pipyuṣīm |
kaṇvā ukthena vāvṛdhuḥ ||

indram id vimahīnām medhe vṛṇīta martyaḥ |
indraṁ saniṣyur ūtaye ||

arvāñcaṁ tvā puruṣṭuta priyamedhastutā harī |
somapeyāya vakṣataḥ ||

śatam ahaṁ tirindire sahasram parśāv ā dade |
rādhāṁsi yādvānām ||

trīṇi śatāny arvatāṁ sahasrā daśa gonām |
daduṣ pajrāya sāmne ||

ud ānaṭ kakuho divam uṣṭrāñ caturyujo dadat |
śravasā yādvaṁ janam ||