Rig Veda · Chapter 8.004

yad indra prāg apāg udaṅ nyag vā hūyase nṛbhiḥ |
simā purū nṛṣūto asy ānave 'si praśardha turvaśe ||

yad vā rume ruśame śyāvake kṛpa indra mādayase sacā |
kaṇvāsas tvā brahmabhiḥ stomavāhasa indrā yacchanty ā gahi ||

yathā gauro apā kṛtaṁ tṛṣyann ety averiṇam |
āpitve naḥ prapitve tūyam ā gahi kaṇveṣu su sacā piba ||

mandantu tvā maghavann indrendavo rādhodeyāya sunvate |
āmuṣyā somam apibaś camū sutaṁ jyeṣṭhaṁ tad dadhiṣe sahaḥ ||

pra cakre sahasā saho babhañja manyum ojasā |
viśve ta indra pṛtanāyavo yaho ni vṛkṣā iva yemire ||

sahasreṇeva sacate yavīyudhā yas ta ānaḻ upastutim |
putram prāvargaṁ kṛṇute suvīrye dāśnoti namaüktibhiḥ ||

mā bhema mā śramiṣmograsya sakhye tava |
mahat te vṛṣṇo abhicakṣyaṁ kṛtam paśyema turvaśaṁ yadum ||

savyām anu sphigyaṁ vāvase vṛṣā na dāno asya roṣati |
madhvā sampṛktāḥ sāragheṇa dhenavas tūyam ehi dravā piba ||

aśvī rathī surūpa id gomām̐ id indra te sakhā |
śvātrabhājā vayasā sacate sadā candro yāti sabhām upa ||

ṛśyo na tṛṣyann avapānam ā gahi pibā somaṁ vaśām̐ anu |
nimeghamāno maghavan dive-diva ojiṣṭhaṁ dadhiṣe sahaḥ ||

adhvaryo drāvayā tvaṁ somam indraḥ pipāsati |
upa nūnaṁ yuyuje vṛṣaṇā harī ā ca jagāma vṛtrahā ||

svayaṁ cit sa manyate dāśurir jano yatrā somasya tṛmpasi |
idaṁ te annaṁ yujyaṁ samukṣitaṁ tasyehi pra dravā piba ||

ratheṣṭhāyādhvaryavaḥ somam indrāya sotana |
adhi bradhnasyādrayo vi cakṣate sunvanto dāśvadhvaram ||

upa bradhnaṁ vāvātā vṛṣaṇā harī indram apasu vakṣataḥ |
arvāñcaṁ tvā saptayo 'dhvaraśriyo vahantu savaned upa ||

pra pūṣaṇaṁ vṛṇīmahe yujyāya purūvasum |
sa śakra śikṣa puruhūta no dhiyā tuje rāye vimocana ||

saṁ naḥ śiśīhi bhurijor iva kṣuraṁ rāsva rāyo vimocana |
tve tan naḥ suvedam usriyaṁ vasu yaṁ tvaṁ hinoṣi martyam ||

vemi tvā pūṣann ṛñjase vemi stotava āghṛṇe |
na tasya vemy araṇaṁ hi tad vaso stuṣe pajrāya sāmne ||

parā gāvo yavasaṁ kac cid āghṛṇe nityaṁ rekṇo amartya |
asmākam pūṣann avitā śivo bhava maṁhiṣṭho vājasātaye ||

sthūraṁ rādhaḥ śatāśvaṁ kuruṅgasya diviṣṭiṣu |
rājñas tveṣasya subhagasya rātiṣu turvaśeṣv amanmahi ||

dhībhiḥ sātāni kāṇvasya vājinaḥ priyamedhair abhidyubhiḥ |
ṣaṣṭiṁ sahasrānu nirmajām aje nir yūthāni gavām ṛṣiḥ ||

vṛkṣāś cin me abhipitve arāraṇuḥ |
gām bhajanta mehanāśvam bhajanta mehanā ||