Rig Veda · Chapter 7.103

saṁvatsaraṁ śaśayānā brāhmaṇā vratacāriṇaḥ |
vācam parjanyajinvitām pra maṇḍūkā avādiṣuḥ ||

divyā āpo abhi yad enam āyan dṛtiṁ na śuṣkaṁ sarasī śayānam |
gavām aha na māyur vatsinīnām maṇḍūkānāṁ vagnur atrā sam eti ||

yad īm enām̐ uśato abhy avarṣīt tṛṣyāvataḥ prāvṛṣy āgatāyām |
akhkhalīkṛtyā pitaraṁ na putro anyo anyam upa vadantam eti ||

anyo anyam anu gṛbhṇāty enor apām prasarge yad amandiṣātām |
maṇḍūko yad abhivṛṣṭaḥ kaniṣkan pṛśniḥ sampṛṅkte haritena vācam ||

yad eṣām anyo anyasya vācaṁ śāktasyeva vadati śikṣamāṇaḥ |
sarvaṁ tad eṣāṁ samṛdheva parva yat suvāco vadathanādhy apsu ||

gomāyur eko ajamāyur ekaḥ pṛśnir eko harita eka eṣām |
samānaṁ nāma bibhrato virūpāḥ purutrā vācam pipiśur vadantaḥ ||

brāhmaṇāso atirātre na some saro na pūrṇam abhito vadantaḥ |
saṁvatsarasya tad ahaḥ pari ṣṭha yan maṇḍūkāḥ prāvṛṣīṇam babhūva ||

brāhmaṇāsaḥ somino vācam akrata brahma kṛṇvantaḥ parivatsarīṇam |
adhvaryavo gharmiṇaḥ siṣvidānā āvir bhavanti guhyā na ke cit ||

devahitiṁ jugupur dvādaśasya ṛtuṁ naro na pra minanty ete |
saṁvatsare prāvṛṣy āgatāyāṁ taptā gharmā aśnuvate visargam ||

gomāyur adād ajamāyur adāt pṛśnir adād dharito no vasūni |
gavām maṇḍūkā dadataḥ śatāni sahasrasāve pra tiranta āyuḥ ||