Rig Veda · Chapter 7.093

śuciṁ nu stomaṁ navajātam adyendrāgnī vṛtrahaṇā juṣethām |
ubhā hi vāṁ suhavā johavīmi tā vājaṁ sadya uśate dheṣṭhā ||

tā sānasī śavasānā hi bhūtaṁ sākaṁvṛdhā śavasā śūśuvāṁsā |
kṣayantau rāyo yavasasya bhūreḥ pṛṅktaṁ vājasya sthavirasya ghṛṣveḥ ||

upo ha yad vidathaṁ vājino gur dhībhir viprāḥ pramatim icchamānāḥ |
arvanto na kāṣṭhāṁ nakṣamāṇā indrāgnī johuvato naras te ||

gīrbhir vipraḥ pramatim icchamāna īṭṭe rayiṁ yaśasam pūrvabhājam |
indrāgnī vṛtrahaṇā suvajrā pra no navyebhis tirataṁ deṣṇaiḥ ||

saṁ yan mahī mithatī spardhamāne tanūrucā śūrasātā yataite |
adevayuṁ vidathe devayubhiḥ satrā hataṁ somasutā janena ||

imām u ṣu somasutim upa na endrāgnī saumanasāya yātam |
nū cid dhi parimamnāthe asmān ā vāṁ śaśvadbhir vavṛtīya vājaiḥ ||

so agna enā namasā samiddho 'cchā mitraṁ varuṇam indraṁ voceḥ |
yat sīm āgaś cakṛmā tat su mṛḻa tad aryamāditiḥ śiśrathantu ||

etā agna āśuṣāṇāsa iṣṭīr yuvoḥ sacābhy aśyāma vājān |
mendro no viṣṇur marutaḥ pari khyan yūyam pāta svastibhiḥ sadā naḥ ||