Rig Veda · Chapter 7.084

ā vāṁ rājānāv adhvare vavṛtyāṁ havyebhir indrāvaruṇā namobhiḥ |
pra vāṁ ghṛtācī bāhvor dadhānā pari tmanā viṣurūpā jigāti ||

yuvo rāṣṭram bṛhad invati dyaur yau setṛbhir arajjubhiḥ sinīthaḥ |
pari no heḻo varuṇasya vṛjyā uruṁ na indraḥ kṛṇavad u lokam ||

kṛtaṁ no yajñaṁ vidatheṣu cāruṁ kṛtam brahmāṇi sūriṣu praśastā |
upo rayir devajūto na etu pra ṇaḥ spārhābhir ūtibhis tiretam ||

asme indrāvaruṇā viśvavāraṁ rayiṁ dhattaṁ vasumantam purukṣum |
pra ya ādityo anṛtā mināty amitā śūro dayate vasūni ||

iyam indraṁ varuṇam aṣṭa me gīḥ prāvat toke tanaye tūtujānā |
suratnāso devavītiṁ gamema yūyam pāta svastibhiḥ sadā naḥ ||