Rig Veda · Chapter 7.077

upo ruruce yuvatir na yoṣā viśvaṁ jīvam prasuvantī carāyai |
abhūd agniḥ samidhe mānuṣāṇām akar jyotir bādhamānā tamāṁsi ||

viśvam pratīcī saprathā ud asthād ruśad vāso bibhratī śukram aśvait |
hiraṇyavarṇā sudṛśīkasaṁdṛg gavām mātā netry ahnām aroci ||

devānāṁ cakṣuḥ subhagā vahantī śvetaṁ nayantī sudṛśīkam aśvam |
uṣā adarśi raśmibhir vyaktā citrāmaghā viśvam anu prabhūtā ||

antivāmā dūre amitram ucchorvīṁ gavyūtim abhayaṁ kṛdhī naḥ |
yāvaya dveṣa ā bharā vasūni codaya rādho gṛṇate maghoni ||

asme śreṣṭhebhir bhānubhir vi bhāhy uṣo devi pratirantī na āyuḥ |
iṣaṁ ca no dadhatī viśvavāre gomad aśvāvad rathavac ca rādhaḥ ||

yāṁ tvā divo duhitar vardhayanty uṣaḥ sujāte matibhir vasiṣṭhāḥ |
sāsmāsu dhā rayim ṛṣvam bṛhantaṁ yūyam pāta svastibhiḥ sadā naḥ ||