Rig Veda · Chapter 7.061

ud vāṁ cakṣur varuṇa supratīkaṁ devayor eti sūryas tatanvān |
abhi yo viśvā bhuvanāni caṣṭe sa manyum martyeṣv ā ciketa ||

pra vāṁ sa mitrāvaruṇāv ṛtāvā vipro manmāni dīrghaśrud iyarti |
yasya brahmāṇi sukratū avātha ā yat kratvā na śaradaḥ pṛṇaithe ||

proror mitrāvaruṇā pṛthivyāḥ pra diva ṛṣvād bṛhataḥ sudānū |
spaśo dadhāthe oṣadhīṣu vikṣv ṛdhag yato animiṣaṁ rakṣamāṇā ||

śaṁsā mitrasya varuṇasya dhāma śuṣmo rodasī badbadhe mahitvā |
ayan māsā ayajvanām avīrāḥ pra yajñamanmā vṛjanaṁ tirāte ||

amūrā viśvā vṛṣaṇāv imā vāṁ na yāsu citraṁ dadṛśe na yakṣam |
druhaḥ sacante anṛtā janānāṁ na vāṁ niṇyāny acite abhūvan ||

sam u vāṁ yajñam mahayaṁ namobhir huve vām mitrāvaruṇā sabādhaḥ |
pra vām manmāny ṛcase navāni kṛtāni brahma jujuṣann imāni ||

iyaṁ deva purohitir yuvabhyāṁ yajñeṣu mitrāvaruṇāv akāri |
viśvāni durgā pipṛtaṁ tiro no yūyam pāta svastibhiḥ sadā naḥ ||