Rig Veda · Chapter 7.056

ka īṁ vyaktā naraḥ sanīḻā rudrasya maryā adha svaśvāḥ ||

nakir hy eṣāṁ janūṁṣi veda te aṅga vidre mitho janitram ||

abhi svapūbhir mitho vapanta vātasvanasaḥ śyenā aspṛdhran ||

etāni dhīro niṇyā ciketa pṛśnir yad ūdho mahī jabhāra ||

sā viṭ suvīrā marudbhir astu sanāt sahantī puṣyantī nṛmṇam ||

yāmaṁ yeṣṭhāḥ śubhā śobhiṣṭhāḥ śriyā sammiślā ojobhir ugrāḥ ||

ugraṁ va ojaḥ sthirā śavāṁsy adhā marudbhir gaṇas tuviṣmān ||

śubhro vaḥ śuṣmaḥ krudhmī manāṁsi dhunir munir iva śardhasya dhṛṣṇoḥ ||

sanemy asmad yuyota didyum mā vo durmatir iha praṇaṅ naḥ ||

priyā vo nāma huve turāṇām ā yat tṛpan maruto vāvaśānāḥ ||

svāyudhāsa iṣmiṇaḥ suniṣkā uta svayaṁ tanva1ḥ śumbhamānāḥ ||

śucī vo havyā marutaḥ śucīnāṁ śuciṁ hinomy adhvaraṁ śucibhyaḥ |
ṛtena satyam ṛtasāpa āyañ chucijanmānaḥ śucayaḥ pāvakāḥ ||

aṁseṣv ā marutaḥ khādayo vo vakṣaḥsu rukmā upaśiśriyāṇāḥ |
vi vidyuto na vṛṣṭibhī rucānā anu svadhām āyudhair yacchamānāḥ ||

pra budhnyā va īrate mahāṁsi pra nāmāni prayajyavas tiradhvam |
sahasriyaṁ damyam bhāgam etaṁ gṛhamedhīyam maruto juṣadhvam ||

yadi stutasya maruto adhīthetthā viprasya vājino havīman |
makṣū rāyaḥ suvīryasya dāta nū cid yam anya ādabhad arāvā ||

atyāso na ye marutaḥ svañco yakṣadṛśo na śubhayanta maryāḥ |
te harmyeṣṭhāḥ śiśavo na śubhrā vatsāso na prakrīḻinaḥ payodhāḥ ||

daśasyanto no maruto mṛḻantu varivasyanto rodasī sumeke |
āre gohā nṛhā vadho vo astu sumnebhir asme vasavo namadhvam ||

ā vo hotā johavīti sattaḥ satrācīṁ rātim maruto gṛṇānaḥ |
ya īvato vṛṣaṇo asti gopāḥ so advayāvī havate va ukthaiḥ ||

ime turam maruto rāmayantīme sahaḥ sahasa ā namanti |
ime śaṁsaṁ vanuṣyato ni pānti guru dveṣo araruṣe dadhanti ||

ime radhraṁ cin maruto junanti bhṛmiṁ cid yathā vasavo juṣanta |
apa bādhadhvaṁ vṛṣaṇas tamāṁsi dhatta viśvaṁ tanayaṁ tokam asme ||

mā vo dātrān maruto nir arāma mā paścād daghma rathyo vibhāge |
ā naḥ spārhe bhajatanā vasavye3 yad īṁ sujātaṁ vṛṣaṇo vo asti ||

saṁ yad dhananta manyubhir janāsaḥ śūrā yahvīṣv oṣadhīṣu vikṣu |
adha smā no maruto rudriyāsas trātāro bhūta pṛtanāsv aryaḥ ||

bhūri cakra marutaḥ pitryāṇy ukthāni yā vaḥ śasyante purā cit |
marudbhir ugraḥ pṛtanāsu sāḻhā marudbhir it sanitā vājam arvā ||

asme vīro marutaḥ śuṣmy astu janānāṁ yo asuro vidhartā |
apo yena sukṣitaye taremādha svam oko abhi vaḥ syāma ||

tan na indro varuṇo mitro agnir āpa oṣadhīr vanino juṣanta |
śarman syāma marutām upasthe yūyam pāta svastibhiḥ sadā naḥ ||