Rig Veda · Chapter 7.036

pra brahmaitu sadanād ṛtasya vi raśmibhiḥ sasṛje sūryo gāḥ |
vi sānunā pṛthivī sasra urvī pṛthu pratīkam adhy edhe agniḥ ||

imāṁ vām mitrāvaruṇā suvṛktim iṣaṁ na kṛṇve asurā navīyaḥ |
ino vām anyaḥ padavīr adabdho janaṁ ca mitro yatati bruvāṇaḥ ||

ā vātasya dhrajato ranta ityā apīpayanta dhenavo na sūdāḥ |
maho divaḥ sadane jāyamāno 'cikradad vṛṣabhaḥ sasminn ūdhan ||

girā ya etā yunajad dharī ta indra priyā surathā śūra dhāyū |
pra yo manyuṁ ririkṣato mināty ā sukratum aryamaṇaṁ vavṛtyām ||

yajante asya sakhyaṁ vayaś ca namasvinaḥ sva ṛtasya dhāman |
vi pṛkṣo bābadhe nṛbhiḥ stavāna idaṁ namo rudrāya preṣṭham ||

ā yat sākaṁ yaśaso vāvaśānāḥ sarasvatī saptathī sindhumātā |
yāḥ suṣvayanta sudughāḥ sudhārā abhi svena payasā pīpyānāḥ ||

uta tye no maruto mandasānā dhiyaṁ tokaṁ ca vājino 'vantu |
mā naḥ pari khyad akṣarā caranty avīvṛdhan yujyaṁ te rayiṁ naḥ ||

pra vo mahīm aramatiṁ kṛṇudhvam pra pūṣaṇaṁ vidathya1ṁ na vīram |
bhagaṁ dhiyo 'vitāraṁ no asyāḥ sātau vājaṁ rātiṣācam puraṁdhim ||

acchāyaṁ vo marutaḥ śloka etv acchā viṣṇuṁ niṣiktapām avobhiḥ |
uta prajāyai gṛṇate vayo dhur yūyam pāta svastibhiḥ sadā naḥ ||