Rig Veda · Chapter 7.024

yoniṣ ṭa indra sadane akāri tam ā nṛbhiḥ puruhūta pra yāhi |
aso yathā no 'vitā vṛdhe ca dado vasūni mamadaś ca somaiḥ ||

gṛbhītaṁ te mana indra dvibarhāḥ sutaḥ somaḥ pariṣiktā madhūni |
visṛṣṭadhenā bharate suvṛktir iyam indraṁ johuvatī manīṣā ||

ā no diva ā pṛthivyā ṛjīṣinn idam barhiḥ somapeyāya yāhi |
vahantu tvā harayo madryañcam āṅgūṣam acchā tavasam madāya ||

ā no viśvābhir ūtibhiḥ sajoṣā brahma juṣāṇo haryaśva yāhi |
varīvṛjat sthavirebhiḥ suśiprāsme dadhad vṛṣaṇaṁ śuṣmam indra ||

eṣa stomo maha ugrāya vāhe dhurī3vātyo na vājayann adhāyi |
indra tvāyam arka īṭṭe vasūnāṁ divīva dyām adhi naḥ śromataṁ dhāḥ ||

evā na indra vāryasya pūrdhi pra te mahīṁ sumatiṁ vevidāma |
iṣam pinva maghavadbhyaḥ suvīrāṁ yūyam pāta svastibhiḥ sadā naḥ ||