Rig Veda · Chapter 6.068

śruṣṭī vāṁ yajña udyataḥ sajoṣā manuṣvad vṛktabarhiṣo yajadhyai |
ā ya indrāvaruṇāv iṣe adya mahe sumnāya maha āvavartat ||

tā hi śreṣṭhā devatātā tujā śūrāṇāṁ śaviṣṭhā tā hi bhūtam |
maghonām maṁhiṣṭhā tuviśuṣma ṛtena vṛtraturā sarvasenā ||

tā gṛṇīhi namasyebhiḥ śūṣaiḥ sumnebhir indrāvaruṇā cakānā |
vajreṇānyaḥ śavasā hanti vṛtraṁ siṣakty anyo vṛjaneṣu vipraḥ ||

gnāś ca yan naraś ca vāvṛdhanta viśve devāso narāṁ svagūrtāḥ |
praibhya indrāvaruṇā mahitvā dyauś ca pṛthivi bhūtam urvī ||

sa it sudānuḥ svavām̐ ṛtāvendrā yo vāṁ varuṇa dāśati tman |
iṣā sa dviṣas tared dāsvān vaṁsad rayiṁ rayivataś ca janān ||

yaṁ yuvaṁ dāśvadhvarāya devā rayiṁ dhattho vasumantam purukṣum |
asme sa indrāvaruṇāv api ṣyāt pra yo bhanakti vanuṣām aśastīḥ ||

uta naḥ sutrātro devagopāḥ sūribhya indrāvaruṇā rayiḥ ṣyāt |
yeṣāṁ śuṣmaḥ pṛtanāsu sāhvān pra sadyo dyumnā tirate taturiḥ ||

nū na indrāvaruṇā gṛṇānā pṛṅktaṁ rayiṁ sauśravasāya devā |
itthā gṛṇanto mahinasya śardho 'po na nāvā duritā tarema ||

pra samrāje bṛhate manma nu priyam arca devāya varuṇāya saprathaḥ |
ayaṁ ya urvī mahinā mahivrataḥ kratvā vibhāty ajaro na śociṣā ||

indrāvaruṇā sutapāv imaṁ sutaṁ somam pibatam madyaṁ dhṛtavratā |
yuvo ratho adhvaraṁ devavītaye prati svasaram upa yāti pītaye ||

indrāvaruṇā madhumattamasya vṛṣṇaḥ somasya vṛṣaṇā vṛṣethām |
idaṁ vām andhaḥ pariṣiktam asme āsadyāsmin barhiṣi mādayethām ||