Rig Veda · Chapter 6.054

sam pūṣan viduṣā naya yo añjasānuśāsati |
ya evedam iti bravat ||

sam u pūṣṇā gamemahi yo gṛhām̐ abhiśāsati |
ima eveti ca bravat ||

pūṣṇaś cakraṁ na riṣyati na kośo 'va padyate |
no asya vyathate paviḥ ||

yo asmai haviṣāvidhan na tam pūṣāpi mṛṣyate |
prathamo vindate vasu ||

pūṣā gā anv etu naḥ pūṣā rakṣatv arvataḥ |
pūṣā vājaṁ sanotu naḥ ||

pūṣann anu pra gā ihi yajamānasya sunvataḥ |
asmākaṁ stuvatām uta ||

mākir neśan mākīṁ riṣan mākīṁ saṁ śāri kevaṭe |
athāriṣṭābhir ā gahi ||

śṛṇvantam pūṣaṇaṁ vayam iryam anaṣṭavedasam |
īśānaṁ rāya īmahe ||

pūṣan tava vrate vayaṁ na riṣyema kadā cana |
stotāras ta iha smasi ||

pari pūṣā parastād dhastaṁ dadhātu dakṣiṇam |
punar no naṣṭam ājatu ||