Rig Veda · Chapter 6.050

huve vo devīm aditiṁ namobhir mṛḻīkāya varuṇam mitram agnim |
abhikṣadām aryamaṇaṁ suśevaṁ trātṝn devān savitāram bhagaṁ ca ||

sujyotiṣaḥ sūrya dakṣapitṝn anāgāstve sumaho vīhi devān |
dvijanmāno ya ṛtasāpaḥ satyāḥ svarvanto yajatā agnijihvāḥ ||

uta dyāvāpṛthivī kṣatram uru bṛhad rodasī śaraṇaṁ suṣumne |
mahas karatho varivo yathā no 'sme kṣayāya dhiṣaṇe anehaḥ ||

ā no rudrasya sūnavo namantām adyā hūtāso vasavo 'dhṛṣṭāḥ |
yad īm arbhe mahati vā hitāso bādhe maruto ahvāma devān ||

mimyakṣa yeṣu rodasī nu devī siṣakti pūṣā abhyardhayajvā |
śrutvā havam maruto yad dha yātha bhūmā rejante adhvani pravikte ||

abhi tyaṁ vīraṁ girvaṇasam arcendram brahmaṇā jaritar navena |
śravad id dhavam upa ca stavāno rāsad vājām̐ upa maho gṛṇānaḥ ||

omānam āpo mānuṣīr amṛktaṁ dhāta tokāya tanayāya śaṁ yoḥ |
yūyaṁ hi ṣṭhā bhiṣajo mātṛtamā viśvasya sthātur jagato janitrīḥ ||

ā no devaḥ savitā trāyamāṇo hiraṇyapāṇir yajato jagamyāt |
yo datravām̐ uṣaso na pratīkaṁ vyūrṇute dāśuṣe vāryāṇi ||

uta tvaṁ sūno sahaso no adyā devām̐ asminn adhvare vavṛtyāḥ |
syām ahaṁ te sadam id rātau tava syām agne 'vasā suvīraḥ ||

uta tyā me havam ā jagmyātaṁ nāsatyā dhībhir yuvam aṅga viprā |
atriṁ na mahas tamaso 'mumuktaṁ tūrvataṁ narā duritād abhīke ||

te no rāyo dyumato vājavato dātāro bhūta nṛvataḥ purukṣoḥ |
daśasyanto divyāḥ pārthivāso gojātā apyā mṛḻatā ca devāḥ ||

te no rudraḥ sarasvatī sajoṣā mīḻhuṣmanto viṣṇur mṛḻantu vāyuḥ |
ṛbhukṣā vājo daivyo vidhātā parjanyāvātā pipyatām iṣaṁ naḥ ||

uta sya devaḥ savitā bhago no 'pāṁ napād avatu dānu papriḥ |
tvaṣṭā devebhir janibhiḥ sajoṣā dyaur devebhiḥ pṛthivī samudraiḥ ||

uta no 'hir budhnyaḥ śṛṇotv aja ekapāt pṛthivī samudraḥ |
viśve devā ṛtāvṛdho huvānāḥ stutā mantrāḥ kaviśastā avantu ||

evā napāto mama tasya dhībhir bharadvājā abhy arcanty arkaiḥ |
gnā hutāso vasavo 'dhṛṣṭā viśve stutāso bhūtā yajatrāḥ ||