Rig Veda · Chapter 6.041

aheḻamāna upa yāhi yajñaṁ tubhyam pavanta indavaḥ sutāsaḥ |
gāvo na vajrin svam oko acchendrā gahi prathamo yajñiyānām ||

yā te kākut sukṛtā yā variṣṭhā yayā śaśvat pibasi madhva ūrmim |
tayā pāhi pra te adhvaryur asthāt saṁ te vajro vartatām indra gavyuḥ ||

eṣa drapso vṛṣabho viśvarūpa indrāya vṛṣṇe sam akāri somaḥ |
etam piba harivaḥ sthātar ugra yasyeśiṣe pradivi yas te annam ||

sutaḥ somo asutād indra vasyān ayaṁ śreyāñ cikituṣe raṇāya |
etaṁ titirva upa yāhi yajñaṁ tena viśvās taviṣīr ā pṛṇasva ||

hvayāmasi tvendra yāhy arvāṅ araṁ te somas tanve bhavāti |
śatakrato mādayasvā suteṣu prāsmām̐ ava pṛtanāsu pra vikṣu ||