Rig Veda · Chapter 6.032

apūrvyā purutamāny asmai mahe vīrāya tavase turāya |
virapśine vajriṇe śaṁtamāni vacāṁsy āsā sthavirāya takṣam ||

sa mātarā sūryeṇā kavīnām avāsayad rujad adriṁ gṛṇānaḥ |
svādhībhir ṛkvabhir vāvaśāna ud usriyāṇām asṛjan nidānam ||

sa vahnibhir ṛkvabhir goṣu śaśvan mitajñubhiḥ purukṛtvā jigāya |
puraḥ purohā sakhibhiḥ sakhīyan dṛḻhā ruroja kavibhiḥ kaviḥ san ||

sa nīvyābhir jaritāram acchā maho vājebhir mahadbhiś ca śuṣmaiḥ |
puruvīrābhir vṛṣabha kṣitīnām ā girvaṇaḥ suvitāya pra yāhi ||

sa sargeṇa śavasā takto atyair apa indro dakṣiṇatas turāṣāṭ |
itthā sṛjānā anapāvṛd arthaṁ dive-dive viviṣur apramṛṣyam ||