Rig Veda · Chapter 6.027

kim asya made kim v asya pītāv indraḥ kim asya sakhye cakāra |
raṇā vā ye niṣadi kiṁ te asya purā vividre kim u nūtanāsaḥ ||

sad asya made sad v asya pītāv indraḥ sad asya sakhye cakāra |
raṇā vā ye niṣadi sat te asya purā vividre sad u nūtanāsaḥ ||

nahi nu te mahimanaḥ samasya na maghavan maghavattvasya vidma |
na rādhaso-rādhaso nūtanasyendra nakir dadṛśa indriyaṁ te ||

etat tyat ta indriyam aceti yenāvadhīr varaśikhasya śeṣaḥ |
vajrasya yat te nihatasya śuṣmāt svanāc cid indra paramo dadāra ||

vadhīd indro varaśikhasya śeṣo 'bhyāvartine cāyamānāya śikṣan |
vṛcīvato yad dhariyūpīyāyāṁ han pūrve ardhe bhiyasāparo dart ||

triṁśacchataṁ varmiṇa indra sākaṁ yavyāvatyām puruhūta śravasyā |
vṛcīvantaḥ śarave patyamānāḥ pātrā bhindānā nyarthāny āyan ||

yasya gāvāv aruṣā sūyavasyū antar ū ṣu carato rerihāṇā |
sa sṛñjayāya turvaśam parādād vṛcīvato daivavātāya śikṣan ||

dvayām̐ agne rathino viṁśatiṁ gā vadhūmato maghavā mahyaṁ samrāṭ |
abhyāvartī cāyamāno dadāti dūṇāśeyaṁ dakṣiṇā pārthavānām ||