Rig Veda · Chapter 6.019

mahām̐ indro nṛvad ā carṣaṇiprā uta dvibarhā aminaḥ sahobhiḥ |
asmadryag vāvṛdhe vīryāyoruḥ pṛthuḥ sukṛtaḥ kartṛbhir bhūt ||

indram eva dhiṣaṇā sātaye dhād bṛhantam ṛṣvam ajaraṁ yuvānam |
aṣāḻhena śavasā śūśuvāṁsaṁ sadyaś cid yo vāvṛdhe asāmi ||

pṛthū karasnā bahulā gabhastī asmadrya1k sam mimīhi śravāṁsi |
yūtheva paśvaḥ paśupā damūnā asmām̐ indrābhy ā vavṛtsvājau ||

taṁ va indraṁ catinam asya śākair iha nūnaṁ vājayanto huvema |
yathā cit pūrve jaritāra āsur anedyā anavadyā ariṣṭāḥ ||

dhṛtavrato dhanadāḥ somavṛddhaḥ sa hi vāmasya vasunaḥ purukṣuḥ |
saṁ jagmire pathyā3 rāyo asmin samudre na sindhavo yādamānāḥ ||

śaviṣṭhaṁ na ā bhara śūra śava ojiṣṭham ojo abhibhūta ugram |
viśvā dyumnā vṛṣṇyā mānuṣāṇām asmabhyaṁ dā harivo mādayadhyai ||

yas te madaḥ pṛtanāṣāḻ amṛdhra indra taṁ na ā bhara śūśuvāṁsam |
yena tokasya tanayasya sātau maṁsīmahi jigīvāṁsas tvotāḥ ||

ā no bhara vṛṣaṇaṁ śuṣmam indra dhanaspṛtaṁ śūśuvāṁsaṁ sudakṣam |
yena vaṁsāma pṛtanāsu śatrūn tavotibhir uta jāmīm̐r ajāmīn ||

ā te śuṣmo vṛṣabha etu paścād ottarād adharād ā purastāt |
ā viśvato abhi sam etv arvāṅ indra dyumnaṁ svarvad dhehy asme ||

nṛvat ta indra nṛtamābhir ūtī vaṁsīmahi vāmaṁ śromatebhiḥ |
īkṣe hi vasva ubhayasya rājan dhā ratnam mahi sthūram bṛhantam ||

marutvantaṁ vṛṣabhaṁ vāvṛdhānam akavāriṁ divyaṁ śāsam indram |
viśvāsāham avase nūtanāyograṁ sahodām iha taṁ huvema ||

janaṁ vajrin mahi cin manyamānam ebhyo nṛbhyo randhayā yeṣv asmi |
adhā hi tvā pṛthivyāṁ śūrasātau havāmahe tanaye goṣv apsu ||

vayaṁ ta ebhiḥ puruhūta sakhyaiḥ śatroḥ-śatror uttara it syāma |
ghnanto vṛtrāṇy ubhayāni śūra rāyā madema bṛhatā tvotāḥ ||