Rig Veda · Chapter 6.017

pibā somam abhi yam ugra tarda ūrvaṁ gavyam mahi gṛṇāna indra |
vi yo dhṛṣṇo vadhiṣo vajrahasta viśvā vṛtram amitriyā śavobhiḥ ||

sa īm pāhi ya ṛjīṣī tarutro yaḥ śipravān vṛṣabho yo matīnām |
yo gotrabhid vajrabhṛd yo hariṣṭhāḥ sa indra citrām̐ abhi tṛndhi vājān ||

evā pāhi pratnathā mandatu tvā śrudhi brahma vāvṛdhasvota gīrbhiḥ |
āviḥ sūryaṁ kṛṇuhi pīpihīṣo jahi śatrūm̐r abhi gā indra tṛndhi ||

te tvā madā bṛhad indra svadhāva ime pītā ukṣayanta dyumantam |
mahām anūnaṁ tavasaṁ vibhūtim matsarāso jarhṛṣanta prasāham ||

yebhiḥ sūryam uṣasam mandasāno 'vāsayo 'pa dṛḻhāni dardrat |
mahām adrim pari gā indra santaṁ nutthā acyutaṁ sadasas pari svāt ||

tava kratvā tava tad daṁsanābhir āmāsu pakvaṁ śacyā ni dīdhaḥ |
aurṇor dura usriyābhyo vi dṛḻhod ūrvād gā asṛjo aṅgirasvān ||

paprātha kṣām mahi daṁso vy u1rvīm upa dyām ṛṣvo bṛhad indra stabhāyaḥ |
adhārayo rodasī devaputre pratne mātarā yahvī ṛtasya ||

adha tvā viśve pura indra devā ekaṁ tavasaṁ dadhire bharāya |
adevo yad abhy auhiṣṭa devān svarṣātā vṛṇata indram atra ||

adha dyauś cit te apa sā nu vajrād dvitānamad bhiyasā svasya manyoḥ |
ahiṁ yad indro abhy ohasānaṁ ni cid viśvāyuḥ śayathe jaghāna ||

adha tvaṣṭā te maha ugra vajraṁ sahasrabhṛṣṭiṁ vavṛtac chatāśrim |
nikāmam aramaṇasaṁ yena navantam ahiṁ sam piṇag ṛjīṣin ||

vardhān yaṁ viśve marutaḥ sajoṣāḥ pacac chatam mahiṣām̐ indra tubhyam |
pūṣā viṣṇus trīṇi sarāṁsi dhāvan vṛtrahaṇam madiram aṁśum asmai ||

ā kṣodo mahi vṛtaṁ nadīnām pariṣṭhitam asṛja ūrmim apām |
tāsām anu pravata indra panthām prārdayo nīcīr apasaḥ samudram ||

evā tā viśvā cakṛvāṁsam indram mahām ugram ajuryaṁ sahodām |
suvīraṁ tvā svāyudhaṁ suvajram ā brahma navyam avase vavṛtyāt ||

sa no vājāya śravasa iṣe ca rāye dhehi dyumata indra viprān |
bharadvāje nṛvata indra sūrīn divi ca smaidhi pārye na indra ||

ayā vājaṁ devahitaṁ sanema madema śatahimāḥ suvīrāḥ ||