Rig Veda · Chapter 6.015

imam ū ṣu vo atithim uṣarbudhaṁ viśvāsāṁ viśām patim ṛñjase girā |
vetīd divo januṣā kac cid ā śucir jyok cid atti garbho yad acyutam ||

mitraṁ na yaṁ sudhitam bhṛgavo dadhur vanaspatāv īḍyam ūrdhvaśociṣam |
sa tvaṁ suprīto vītahavye adbhuta praśastibhir mahayase dive-dive ||

sa tvaṁ dakṣasyāvṛko vṛdho bhūr aryaḥ parasyāntarasya taruṣaḥ |
rāyaḥ sūno sahaso martyeṣv ā chardir yaccha vītahavyāya sapratho bharadvājāya saprathaḥ ||

dyutānaṁ vo atithiṁ svarṇaram agniṁ hotāram manuṣaḥ svadhvaram |
vipraṁ na dyukṣavacasaṁ suvṛktibhir havyavāham aratiṁ devam ṛñjase ||

pāvakayā yaś citayantyā kṛpā kṣāman ruruca uṣaso na bhānunā |
tūrvan na yāmann etaśasya nū raṇa ā yo ghṛṇe na tatṛṣāṇo ajaraḥ ||

agnim-agniṁ vaḥ samidhā duvasyata priyam-priyaṁ vo atithiṁ gṛṇīṣaṇi |
upa vo gīrbhir amṛtaṁ vivāsata devo deveṣu vanate hi vāryaṁ devo deveṣu vanate hi no duvaḥ ||

samiddham agniṁ samidhā girā gṛṇe śucim pāvakam puro adhvare dhruvam |
vipraṁ hotāram puruvāram adruhaṁ kaviṁ sumnair īmahe jātavedasam ||

tvāṁ dūtam agne amṛtaṁ yuge-yuge havyavāhaṁ dadhire pāyum īḍyam |
devāsaś ca martāsaś ca jāgṛviṁ vibhuṁ viśpatiṁ namasā ni ṣedire ||

vibhūṣann agna ubhayām̐ anu vratā dūto devānāṁ rajasī sam īyase |
yat te dhītiṁ sumatim āvṛṇīmahe 'dha smā nas trivarūthaḥ śivo bhava ||

taṁ supratīkaṁ sudṛśaṁ svañcam avidvāṁso viduṣṭaraṁ sapema |
sa yakṣad viśvā vayunāni vidvān pra havyam agnir amṛteṣu vocat ||

tam agne pāsy uta tam piparṣi yas ta ānaṭ kavaye śūra dhītim |
yajñasya vā niśitiṁ voditiṁ vā tam it pṛṇakṣi śavasota rāyā ||

tvam agne vanuṣyato ni pāhi tvam u naḥ sahasāvann avadyāt |
saṁ tvā dhvasmanvad abhy etu pāthaḥ saṁ rayiḥ spṛhayāyyaḥ sahasrī ||

agnir hotā gṛhapatiḥ sa rājā viśvā veda janimā jātavedāḥ |
devānām uta yo martyānāṁ yajiṣṭhaḥ sa pra yajatām ṛtāvā ||

agne yad adya viśo adhvarasya hotaḥ pāvakaśoce veṣ ṭvaṁ hi yajvā |
ṛtā yajāsi mahinā vi yad bhūr havyā vaha yaviṣṭha yā te adya ||

abhi prayāṁsi sudhitāni hi khyo ni tvā dadhīta rodasī yajadhyai |
avā no maghavan vājasātāv agne viśvāni duritā tarema tā tarema tavāvasā tarema ||

agne viśvebhiḥ svanīka devair ūrṇāvantam prathamaḥ sīda yonim |
kulāyinaṁ ghṛtavantaṁ savitre yajñaṁ naya yajamānāya sādhu ||

imam u tyam atharvavad agnim manthanti vedhasaḥ |
yam aṅkūyantam ānayann amūraṁ śyāvyābhyaḥ ||

janiṣvā devavītaye sarvatātā svastaye |
ā devān vakṣy amṛtām̐ ṛtāvṛdho yajñaṁ deveṣu pispṛśaḥ ||

vayam u tvā gṛhapate janānām agne akarma samidhā bṛhantam |
asthūri no gārhapatyāni santu tigmena nas tejasā saṁ śiśādhi ||