Rig Veda · Chapter 6.013

tvad viśvā subhaga saubhagāny agne vi yanti vanino na vayāḥ |
śruṣṭī rayir vājo vṛtratūrye divo vṛṣṭir īḍyo rītir apām ||

tvam bhago na ā hi ratnam iṣe parijmeva kṣayasi dasmavarcāḥ |
agne mitro na bṛhata ṛtasyāsi kṣattā vāmasya deva bhūreḥ ||

sa satpatiḥ śavasā hanti vṛtram agne vipro vi paṇer bharti vājam |
yaṁ tvam praceta ṛtajāta rāyā sajoṣā naptrāpāṁ hinoṣi ||

yas te sūno sahaso gīrbhir ukthair yajñair marto niśitiṁ vedyānaṭ |
viśvaṁ sa deva prati vāram agne dhatte dhānya1m patyate vasavyaiḥ ||

tā nṛbhya ā sauśravasā suvīrāgne sūno sahasaḥ puṣyase dhāḥ |
kṛṇoṣi yac chavasā bhūri paśvo vayo vṛkāyāraye jasuraye ||

vadmā sūno sahaso no vihāyā agne tokaṁ tanayaṁ vāji no dāḥ |
viśvābhir gīrbhir abhi pūrtim aśyām madema śatahimāḥ suvīrāḥ ||