Rig Veda · Chapter 5.085

pra samrāje bṛhad arcā gabhīram brahma priyaṁ varuṇāya śrutāya |
vi yo jaghāna śamiteva carmopastire pṛthivīṁ sūryāya ||

vaneṣu vy a1ntarikṣaṁ tatāna vājam arvatsu paya usriyāsu |
hṛtsu kratuṁ varuṇo apsv a1gniṁ divi sūryam adadhāt somam adrau ||

nīcīnabāraṁ varuṇaḥ kavandham pra sasarja rodasī antarikṣam |
tena viśvasya bhuvanasya rājā yavaṁ na vṛṣṭir vy unatti bhūma ||

unatti bhūmim pṛthivīm uta dyāṁ yadā dugdhaṁ varuṇo vaṣṭy ād it |
sam abhreṇa vasata parvatāsas taviṣīyantaḥ śrathayanta vīrāḥ ||

imām ū ṣv āsurasya śrutasya mahīm māyāṁ varuṇasya pra vocam |
māneneva tasthivām̐ antarikṣe vi yo mame pṛthivīṁ sūryeṇa ||

imām ū nu kavitamasya māyām mahīṁ devasya nakir ā dadharṣa |
ekaṁ yad udnā na pṛṇanty enīr āsiñcantīr avanayaḥ samudram ||

aryamyaṁ varuṇa mitryaṁ vā sakhāyaṁ vā sadam id bhrātaraṁ vā |
veśaṁ vā nityaṁ varuṇāraṇaṁ vā yat sīm āgaś cakṛmā śiśrathas tat ||

kitavāso yad riripur na dīvi yad vā ghā satyam uta yan na vidma |
sarvā tā vi ṣya śithireva devādhā te syāma varuṇa priyāsaḥ ||