Rig Veda · Chapter 5.069

trī rocanā varuṇa trīm̐r uta dyūn trīṇi mitra dhārayatho rajāṁsi |
vāvṛdhānāv amatiṁ kṣatriyasyānu vrataṁ rakṣamāṇāv ajuryam ||

irāvatīr varuṇa dhenavo vām madhumad vāṁ sindhavo mitra duhre |
trayas tasthur vṛṣabhāsas tisṛṇāṁ dhiṣaṇānāṁ retodhā vi dyumantaḥ ||

prātar devīm aditiṁ johavīmi madhyaṁdina uditā sūryasya |
rāye mitrāvaruṇā sarvatāteḻe tokāya tanayāya śaṁ yoḥ ||

yā dhartārā rajaso rocanasyotādityā divyā pārthivasya |
na vāṁ devā amṛtā ā minanti vratāni mitrāvaruṇā dhruvāṇi ||