Rig Veda · Chapter 5.062

ṛtena ṛtam apihitaṁ dhruvaṁ vāṁ sūryasya yatra vimucanty aśvān |
daśa śatā saha tasthus tad ekaṁ devānāṁ śreṣṭhaṁ vapuṣām apaśyam ||

tat su vām mitrāvaruṇā mahitvam īrmā tasthuṣīr ahabhir duduhre |
viśvāḥ pinvathaḥ svasarasya dhenā anu vām ekaḥ pavir ā vavarta ||

adhārayatam pṛthivīm uta dyām mitrarājānā varuṇā mahobhiḥ |
vardhayatam oṣadhīḥ pinvataṁ gā ava vṛṣṭiṁ sṛjataṁ jīradānū ||

ā vām aśvāsaḥ suyujo vahantu yataraśmaya upa yantv arvāk |
ghṛtasya nirṇig anu vartate vām upa sindhavaḥ pradivi kṣaranti ||

anu śrutām amatiṁ vardhad urvīm barhir iva yajuṣā rakṣamāṇā |
namasvantā dhṛtadakṣādhi garte mitrāsāthe varuṇeḻāsv antaḥ ||

akravihastā sukṛte paraspā yaṁ trāsāthe varuṇeḻāsv antaḥ |
rājānā kṣatram ahṛṇīyamānā sahasrasthūṇam bibhṛthaḥ saha dvau ||

hiraṇyanirṇig ayo asya sthūṇā vi bhrājate divy a1śvājanīva |
bhadre kṣetre nimitā tilvile vā sanema madhvo adhigartyasya ||

hiraṇyarūpam uṣaso vyuṣṭāv ayaḥsthūṇam uditā sūryasya |
ā rohatho varuṇa mitra gartam ataś cakṣāthe aditiṁ ditiṁ ca ||

yad baṁhiṣṭhaṁ nātividhe sudānū acchidraṁ śarma bhuvanasya gopā |
tena no mitrāvaruṇāv aviṣṭaṁ siṣāsanto jigīvāṁsaḥ syāma ||