Rig Veda · Chapter 5.059

pra vaḥ spaḻ akran suvitāya dāvane 'rcā dive pra pṛthivyā ṛtam bhare |
ukṣante aśvān taruṣanta ā rajo 'nu svam bhānuṁ śrathayante arṇavaiḥ ||

amād eṣām bhiyasā bhūmir ejati naur na pūrṇā kṣarati vyathir yatī |
dūredṛśo ye citayanta emabhir antar mahe vidathe yetire naraḥ ||

gavām iva śriyase śṛṅgam uttamaṁ sūryo na cakṣū rajaso visarjane |
atyā iva subhva1ś cāravaḥ sthana maryā iva śriyase cetathā naraḥ ||

ko vo mahānti mahatām ud aśnavat kas kāvyā marutaḥ ko ha pauṁsyā |
yūyaṁ ha bhūmiṁ kiraṇaṁ na rejatha pra yad bharadhve suvitāya dāvane ||

aśvā ived aruṣāsaḥ sabandhavaḥ śūrā iva prayudhaḥ prota yuyudhuḥ |
maryā iva suvṛdho vāvṛdhur naraḥ sūryasya cakṣuḥ pra minanti vṛṣṭibhiḥ ||

te ajyeṣṭhā akaniṣṭhāsa udbhido 'madhyamāso mahasā vi vāvṛdhuḥ |
sujātāso januṣā pṛśnimātaro divo maryā ā no acchā jigātana ||

vayo na ye śreṇīḥ paptur ojasāntān divo bṛhataḥ sānunas pari |
aśvāsa eṣām ubhaye yathā viduḥ pra parvatasya nabhanūm̐r acucyavuḥ ||

mimātu dyaur aditir vītaye naḥ saṁ dānucitrā uṣaso yatantām |
ācucyavur divyaṁ kośam eta ṛṣe rudrasya maruto gṛṇānāḥ ||