Rig Veda · Chapter 5.040

ā yāhy adribhiḥ sutaṁ somaṁ somapate piba |
vṛṣann indra vṛṣabhir vṛtrahantama ||

vṛṣā grāvā vṛṣā mado vṛṣā somo ayaṁ sutaḥ |
vṛṣann indra vṛṣabhir vṛtrahantama ||

vṛṣā tvā vṛṣaṇaṁ huve vajriñ citrābhir ūtibhiḥ |
vṛṣann indra vṛṣabhir vṛtrahantama ||

ṛjīṣī vajrī vṛṣabhas turāṣāṭ chuṣmī rājā vṛtrahā somapāvā |
yuktvā haribhyām upa yāsad arvāṅ mādhyaṁdine savane matsad indraḥ ||

yat tvā sūrya svarbhānus tamasāvidhyad āsuraḥ |
akṣetravid yathā mugdho bhuvanāny adīdhayuḥ ||

svarbhānor adha yad indra māyā avo divo vartamānā avāhan |
gūḻhaṁ sūryaṁ tamasāpavratena turīyeṇa brahmaṇāvindad atriḥ ||

mā mām imaṁ tava santam atra irasyā drugdho bhiyasā ni gārīt |
tvam mitro asi satyarādhās tau mehāvataṁ varuṇaś ca rājā ||

grāvṇo brahmā yuyujānaḥ saparyan kīriṇā devān namasopaśikṣan |
atriḥ sūryasya divi cakṣur ādhāt svarbhānor apa māyā aghukṣat ||

yaṁ vai sūryaṁ svarbhānus tamasāvidhyad āsuraḥ |
atrayas tam anv avindan nahy a1nye aśaknuvan ||