Rig Veda · Chapter 5.034

ajātaśatrum ajarā svarvaty anu svadhāmitā dasmam īyate |
sunotana pacata brahmavāhase puruṣṭutāya prataraṁ dadhātana ||

ā yaḥ somena jaṭharam apipratāmandata maghavā madhvo andhasaḥ |
yad īm mṛgāya hantave mahāvadhaḥ sahasrabhṛṣṭim uśanā vadhaṁ yamat ||

yo asmai ghraṁsa uta vā ya ūdhani somaṁ sunoti bhavati dyumām̐ aha |
apāpa śakras tatanuṣṭim ūhati tanūśubhram maghavā yaḥ kavāsakhaḥ ||

yasyāvadhīt pitaraṁ yasya mātaraṁ yasya śakro bhrātaraṁ nāta īṣate |
vetīd v asya prayatā yataṁkaro na kilbiṣād īṣate vasva ākaraḥ ||

na pañcabhir daśabhir vaṣṭy ārabhaṁ nāsunvatā sacate puṣyatā cana |
jināti ved amuyā hanti vā dhunir ā devayum bhajati gomati vraje ||

vitvakṣaṇaḥ samṛtau cakramāsajo 'sunvato viṣuṇaḥ sunvato vṛdhaḥ |
indro viśvasya damitā vibhīṣaṇo yathāvaśaṁ nayati dāsam āryaḥ ||

sam īm paṇer ajati bhojanam muṣe vi dāśuṣe bhajati sūnaraṁ vasu |
durge cana dhriyate viśva ā puru jano yo asya taviṣīm acukrudhat ||

saṁ yaj janau sudhanau viśvaśardhasāv aved indro maghavā goṣu śubhriṣu |
yujaṁ hy a1nyam akṛta pravepany ud īṁ gavyaṁ sṛjate satvabhir dhuniḥ ||

sahasrasām āgniveśiṁ gṛṇīṣe śatrim agna upamāṁ ketum aryaḥ |
tasmā āpaḥ saṁyataḥ pīpayanta tasmin kṣatram amavat tveṣam astu ||