Rig Veda · Chapter 5.029

try aryamā manuṣo devatātā trī rocanā divyā dhārayanta |
arcanti tvā marutaḥ pūtadakṣās tvam eṣām ṛṣir indrāsi dhīraḥ ||

anu yad īm maruto mandasānam ārcann indram papivāṁsaṁ sutasya |
ādatta vajram abhi yad ahiṁ hann apo yahvīr asṛjat sartavā u ||

uta brahmāṇo maruto me asyendraḥ somasya suṣutasya peyāḥ |
tad dhi havyam manuṣe gā avindad ahann ahim papivām̐ indro asya ||

ād rodasī vitaraṁ vi ṣkabhāyat saṁvivyānaś cid bhiyase mṛgaṁ kaḥ |
jigartim indro apajargurāṇaḥ prati śvasantam ava dānavaṁ han ||

adha kratvā maghavan tubhyaṁ devā anu viśve adaduḥ somapeyam |
yat sūryasya haritaḥ patantīḥ puraḥ satīr uparā etaśe kaḥ ||

nava yad asya navatiṁ ca bhogān sākaṁ vajreṇa maghavā vivṛścat |
arcantīndram marutaḥ sadhasthe traiṣṭubhena vacasā bādhata dyām ||

sakhā sakhye apacat tūyam agnir asya kratvā mahiṣā trī śatāni |
trī sākam indro manuṣaḥ sarāṁsi sutam pibad vṛtrahatyāya somam ||

trī yac chatā mahiṣāṇām agho mās trī sarāṁsi maghavā somyāpāḥ |
kāraṁ na viśve ahvanta devā bharam indrāya yad ahiṁ jaghāna ||

uśanā yat sahasyai3r ayātaṁ gṛham indra jūjuvānebhir aśvaiḥ |
vanvāno atra sarathaṁ yayātha kutsena devair avanor ha śuṣṇam ||

prānyac cakram avṛhaḥ sūryasya kutsāyānyad varivo yātave 'kaḥ |
anāso dasyūm̐r amṛṇo vadhena ni duryoṇa āvṛṇaṅ mṛdhravācaḥ ||

stomāsas tvā gaurivīter avardhann arandhayo vaidathināya piprum |
ā tvām ṛjiśvā sakhyāya cakre pacan paktīr apibaḥ somam asya ||

navagvāsaḥ sutasomāsa indraṁ daśagvāso abhy arcanty arkaiḥ |
gavyaṁ cid ūrvam apidhānavantaṁ taṁ cin naraḥ śaśamānā apa vran ||

katho nu te pari carāṇi vidvān vīryā maghavan yā cakartha |
yā co nu navyā kṛṇavaḥ śaviṣṭha pred u tā te vidatheṣu bravāma ||

etā viśvā cakṛvām̐ indra bhūry aparīto januṣā vīryeṇa |
yā cin nu vajrin kṛṇavo dadhṛṣvān na te vartā taviṣyā asti tasyāḥ ||

indra brahma kriyamāṇā juṣasva yā te śaviṣṭha navyā akarma |
vastreva bhadrā sukṛtā vasūyū rathaṁ na dhīraḥ svapā atakṣam ||