Rig Veda · Chapter 4.045

eṣa sya bhānur ud iyarti yujyate rathaḥ parijmā divo asya sānavi |
pṛkṣāso asmin mithunā adhi trayo dṛtis turīyo madhuno vi rapśate ||

ud vām pṛkṣāso madhumanta īrate rathā aśvāsa uṣaso vyuṣṭiṣu |
aporṇuvantas tama ā parīvṛtaṁ sva1r ṇa śukraṁ tanvanta ā rajaḥ ||

madhvaḥ pibatam madhupebhir āsabhir uta priyam madhune yuñjāthāṁ ratham |
ā vartanim madhunā jinvathas patho dṛtiṁ vahethe madhumantam aśvinā ||

haṁsāso ye vām madhumanto asridho hiraṇyaparṇā uhuva uṣarbudhaḥ |
udapruto mandino mandinispṛśo madhvo na makṣaḥ savanāni gacchathaḥ ||

svadhvarāso madhumanto agnaya usrā jarante prati vastor aśvinā |
yan niktahastas taraṇir vicakṣaṇaḥ somaṁ suṣāva madhumantam adribhiḥ ||

ākenipāso ahabhir davidhvataḥ sva1r ṇa śukraṁ tanvanta ā rajaḥ |
sūraś cid aśvān yuyujāna īyate viśvām̐ anu svadhayā cetathas pathaḥ ||

pra vām avocam aśvinā dhiyaṁdhā rathaḥ svaśvo ajaro yo asti |
yena sadyaḥ pari rajāṁsi yātho haviṣmantaṁ taraṇim bhojam accha ||