Rig Veda · Chapter 4.031

kayā naś citra ā bhuvad ūtī sadāvṛdhaḥ sakhā |
kayā śaciṣṭhayā vṛtā ||

kas tvā satyo madānām maṁhiṣṭho matsad andhasaḥ |
dṛḻhā cid āruje vasu ||

abhī ṣu ṇaḥ sakhīnām avitā jaritṝṇām |
śatam bhavāsy ūtibhiḥ ||

abhī na ā vavṛtsva cakraṁ na vṛttam arvataḥ |
niyudbhiś carṣaṇīnām ||

pravatā hi kratūnām ā hā padeva gacchasi |
abhakṣi sūrye sacā ||

saṁ yat ta indra manyavaḥ saṁ cakrāṇi dadhanvire |
adha tve adha sūrye ||

uta smā hi tvām āhur in maghavānaṁ śacīpate |
dātāram avidīdhayum ||

uta smā sadya it pari śaśamānāya sunvate |
purū cin maṁhase vasu ||

nahi ṣmā te śataṁ cana rādho varanta āmuraḥ |
na cyautnāni kariṣyataḥ ||

asmām̐ avantu te śatam asmān sahasram ūtayaḥ |
asmān viśvā abhiṣṭayaḥ ||

asmām̐ ihā vṛṇīṣva sakhyāya svastaye |
maho rāye divitmate ||

asmām̐ aviḍḍhi viśvahendra rāyā parīṇasā |
asmān viśvābhir ūtibhiḥ ||

asmabhyaṁ tām̐ apā vṛdhi vrajām̐ asteva gomataḥ |
navābhir indrotibhiḥ ||

asmākaṁ dhṛṣṇuyā ratho dyumām̐ indrānapacyutaḥ |
gavyur aśvayur īyate ||

asmākam uttamaṁ kṛdhi śravo deveṣu sūrya |
varṣiṣṭhaṁ dyām ivopari ||