Scripture Library

Rig Veda · Chapter 4.002

4.002.01

yo martyeṣv amṛta ṛtāvā devo deveṣv aratir nidhāyi |
hotā yajiṣṭho mahnā śucadhyai havyair agnir manuṣa īrayadhyai ||

4.002.02

iha tvaṁ sūno sahaso no adya jāto jātām̐ ubhayām̐ antar agne |
dūta īyase yuyujāna ṛṣva ṛjumuṣkān vṛṣaṇaḥ śukrām̐ś ca ||

4.002.03

atyā vṛdhasnū rohitā ghṛtasnū ṛtasya manye manasā javiṣṭhā |
antar īyase aruṣā yujāno yuṣmām̐ś ca devān viśa ā ca martān ||

4.002.04

aryamaṇaṁ varuṇam mitram eṣām indrāviṣṇū maruto aśvinota |
svaśvo agne surathaḥ surādhā ed u vaha suhaviṣe janāya ||

4.002.05

gomām̐ agne 'vimām̐ aśvī yajño nṛvatsakhā sadam id apramṛṣyaḥ |
iḻāvām̐ eṣo asura prajāvān dīrgho rayiḥ pṛthubudhnaḥ sabhāvān ||

4.002.06

yas ta idhmaṁ jabharat siṣvidāno mūrdhānaṁ vā tatapate tvāyā |
bhuvas tasya svatavām̐ḥ pāyur agne viśvasmāt sīm aghāyata uruṣya ||

4.002.07

yas te bharād anniyate cid annaṁ niśiṣan mandram atithim udīrat |
ā devayur inadhate duroṇe tasmin rayir dhruvo astu dāsvān ||

4.002.08

yas tvā doṣā ya uṣasi praśaṁsāt priyaṁ vā tvā kṛṇavate haviṣmān |
aśvo na sve dama ā hemyāvān tam aṁhasaḥ pīparo dāśvāṁsam ||

4.002.09

yas tubhyam agne amṛtāya dāśad duvas tve kṛṇavate yatasruk |
na sa rāyā śaśamāno vi yoṣan nainam aṁhaḥ pari varad aghāyoḥ ||

4.002.10

yasya tvam agne adhvaraṁ jujoṣo devo martasya sudhitaṁ rarāṇaḥ |
prīted asad dhotrā sā yaviṣṭhāsāma yasya vidhato vṛdhāsaḥ ||

4.002.11

cittim acittiṁ cinavad vi vidvān pṛṣṭheva vītā vṛjinā ca martān |
rāye ca naḥ svapatyāya deva ditiṁ ca rāsvāditim uruṣya ||

4.002.12

kaviṁ śaśāsuḥ kavayo 'dabdhā nidhārayanto duryāsv āyoḥ |
atas tvaṁ dṛśyām̐ agna etān paḍbhiḥ paśyer adbhutām̐ arya evaiḥ ||

4.002.13

tvam agne vāghate supraṇītiḥ sutasomāya vidhate yaviṣṭha |
ratnam bhara śaśamānāya ghṛṣve pṛthu ścandram avase carṣaṇiprāḥ ||

4.002.14

adhā ha yad vayam agne tvāyā paḍbhir hastebhiś cakṛmā tanūbhiḥ |
rathaṁ na kranto apasā bhurijor ṛtaṁ yemuḥ sudhya āśuṣāṇāḥ ||

4.002.15

adhā mātur uṣasaḥ sapta viprā jāyemahi prathamā vedhaso nṝn |
divas putrā aṅgiraso bhavemādriṁ rujema dhaninaṁ śucantaḥ ||

4.002.16

adhā yathā naḥ pitaraḥ parāsaḥ pratnāso agna ṛtam āśuṣāṇāḥ |
śucīd ayan dīdhitim ukthaśāsaḥ kṣāmā bhindanto aruṇīr apa vran ||

4.002.17

sukarmāṇaḥ suruco devayanto 'yo na devā janimā dhamantaḥ |
śucanto agniṁ vavṛdhanta indram ūrvaṁ gavyam pariṣadanto agman ||

4.002.18

ā yūtheva kṣumati paśvo akhyad devānāṁ yaj janimānty ugra |
martānāṁ cid urvaśīr akṛpran vṛdhe cid arya uparasyāyoḥ ||

4.002.19

akarma te svapaso abhūma ṛtam avasrann uṣaso vibhātīḥ |
anūnam agnim purudhā suścandraṁ devasya marmṛjataś cāru cakṣuḥ ||

4.002.20

etā te agna ucathāni vedho 'vocāma kavaye tā juṣasva |
uc chocasva kṛṇuhi vasyaso no maho rāyaḥ puruvāra pra yandhi ||

Original text: Ṛgveda-Saṃhitā · Edition: Theodor Aufrecht Die Hymnen des Rigveda. Mandala I-VI Bonn Mareus Theodor Aufrecht Die Hymnen des Rigveda. Mandala VII-X Bonn Mareus · Data entry Barend A. Van Nooten Gary B. Holland · GRETIL (Göttingen) · CC BY-NC-SA 4.0