Rig Veda · Chapter 3.060

iheha vo manasā bandhutā nara uśijo jagmur abhi tāni vedasā |
yābhir māyābhiḥ pratijūtivarpasaḥ saudhanvanā yajñiyam bhāgam ānaśa ||

yābhiḥ śacībhiś camasām̐ apiṁśata yayā dhiyā gām ariṇīta carmaṇaḥ |
yena harī manasā niratakṣata tena devatvam ṛbhavaḥ sam ānaśa ||

indrasya sakhyam ṛbhavaḥ sam ānaśur manor napāto apaso dadhanvire |
saudhanvanāso amṛtatvam erire viṣṭvī śamībhiḥ sukṛtaḥ sukṛtyayā ||

indreṇa yātha sarathaṁ sute sacām̐ atho vaśānām bhavathā saha śriyā |
na vaḥ pratimai sukṛtāni vāghataḥ saudhanvanā ṛbhavo vīryāṇi ca ||

indra ṛbhubhir vājavadbhiḥ samukṣitaṁ sutaṁ somam ā vṛṣasvā gabhastyoḥ |
dhiyeṣito maghavan dāśuṣo gṛhe saudhanvanebhiḥ saha matsvā nṛbhiḥ ||

indra ṛbhumān vājavān matsveha no 'smin savane śacyā puruṣṭuta |
imāni tubhyaṁ svasarāṇi yemire vratā devānām manuṣaś ca dharmabhiḥ ||

indra ṛbhubhir vājibhir vājayann iha stomaṁ jaritur upa yāhi yajñiyam |
śataṁ ketebhir iṣirebhir āyave sahasraṇītho adhvarasya homani ||