Rig Veda · Chapter 3.056

na tā minanti māyino na dhīrā vratā devānām prathamā dhruvāṇi |
na rodasī adruhā vedyābhir na parvatā niname tasthivāṁsaḥ ||

ṣaḍ bhārām̐ eko acaran bibharty ṛtaṁ varṣiṣṭham upa gāva āguḥ |
tisro mahīr uparās tasthur atyā guhā dve nihite darśy ekā ||

tripājasyo vṛṣabho viśvarūpa uta tryudhā purudha prajāvān |
tryanīkaḥ patyate māhināvān sa retodhā vṛṣabhaḥ śaśvatīnām ||

abhīka āsām padavīr abodhy ādityānām ahve cāru nāma |
āpaś cid asmā aramanta devīḥ pṛthag vrajantīḥ pari ṣīm avṛñjan ||

trī ṣadhasthā sindhavas triḥ kavīnām uta trimātā vidatheṣu samrāṭ |
ṛtāvarīr yoṣaṇās tisro apyās trir ā divo vidathe patyamānāḥ ||

trir ā divaḥ savitar vāryāṇi dive-diva ā suva trir no ahnaḥ |
tridhātu rāya ā suvā vasūni bhaga trātar dhiṣaṇe sātaye dhāḥ ||

trir ā divaḥ savitā soṣavīti rājānā mitrāvaruṇā supāṇī |
āpaś cid asya rodasī cid urvī ratnam bhikṣanta savituḥ savāya ||

trir uttamā dūṇaśā rocanāni trayo rājanty asurasya vīrāḥ |
ṛtāvāna iṣirā dūḻabhāsas trir ā divo vidathe santu devāḥ ||