Rig Veda · Chapter 3.045

ā mandrair indra haribhir yāhi mayūraromabhiḥ |
mā tvā ke cin ni yaman viṁ na pāśino 'ti dhanveva tām̐ ihi ||

vṛtrakhādo valaṁrujaḥ purāṁ darmo apām ajaḥ |
sthātā rathasya haryor abhisvara indro dṛḻhā cid ārujaḥ ||

gambhīrām̐ udadhīm̐r iva kratum puṣyasi gā iva |
pra sugopā yavasaṁ dhenavo yathā hradaṁ kulyā ivāśata ||

ā nas tujaṁ rayim bharāṁśaṁ na pratijānate |
vṛkṣam pakvam phalam aṅkīva dhūnuhīndra sampāraṇaṁ vasu ||

svayur indra svarāḻ asi smaddiṣṭiḥ svayaśastaraḥ |
sa vāvṛdhāna ojasā puruṣṭuta bhavā naḥ suśravastamaḥ ||