Rig Veda · Chapter 2.005

hotājaniṣṭa cetanaḥ pitā pitṛbhya ūtaye |
prayakṣañ jenyaṁ vasu śakema vājino yamam ||

ā yasmin sapta raśmayas tatā yajñasya netari |
manuṣvad daivyam aṣṭamam potā viśvaṁ tad invati ||

dadhanve vā yad īm anu vocad brahmāṇi ver u tat |
pari viśvāni kāvyā nemiś cakram ivābhavat ||

sākaṁ hi śucinā śuciḥ praśāstā kratunājani |
vidvām̐ asya vratā dhruvā vayā ivānu rohate ||

tā asya varṇam āyuvo neṣṭuḥ sacanta dhenavaḥ |
kuvit tisṛbhya ā varaṁ svasāro yā idaṁ yayuḥ ||

yadī mātur upa svasā ghṛtam bharanty asthita |
tāsām adhvaryur āgatau yavo vṛṣṭīva modate ||

svaḥ svāya dhāyase kṛṇutām ṛtvig ṛtvijam |
stomaṁ yajñaṁ cād araṁ vanemā rarimā vayam ||

yathā vidvām̐ araṁ karad viśvebhyo yajatebhyaḥ |
ayam agne tve api yaṁ yajñaṁ cakṛmā vayam ||