Rig Veda · Chapter 10.173
ā tvāhārṣam antar edhi dhruvas tiṣṭhāvicācaliḥ |
viśas tvā sarvā vāñchantu mā tvad rāṣṭram adhi bhraśat ||
ihaivaidhi māpa cyoṣṭhāḥ parvata ivāvicācaliḥ |
indra iveha dhruvas tiṣṭheha rāṣṭram u dhāraya ||
imam indro adīdharad dhruvaṁ dhruveṇa haviṣā |
tasmai somo adhi bravat tasmā u brahmaṇas patiḥ ||
dhruvā dyaur dhruvā pṛthivī dhruvāsaḥ parvatā ime |
dhruvaṁ viśvam idaṁ jagad dhruvo rājā viśām ayam ||
dhruvaṁ te rājā varuṇo dhruvaṁ devo bṛhaspatiḥ |
dhruvaṁ ta indraś cāgniś ca rāṣṭraṁ dhārayatāṁ dhruvam ||
dhruvaṁ dhruveṇa haviṣābhi somam mṛśāmasi |
atho ta indraḥ kevalīr viśo balihṛtas karat ||
Original text: Ṛgveda-Saṃhitā · Edition: Theodor Aufrecht Die Hymnen des Rigveda. Mandala I-VI Bonn Mareus Theodor Aufrecht Die Hymnen des Rigveda. Mandala VII-X Bonn Mareus · Data entry Barend A. Van Nooten Gary B. Holland · GRETIL (Göttingen) · CC BY-NC-SA 4.0