ઋગ્વેદ · અધ્યાય 10.173

આ ત્વાહાર્ષમ્ અન્તર્ એધિ ધ્રુવસ્ તિષ્ઠાવિચાચલિઃ ।
વિશસ્ ત્વા સર્વા વાઞ્છન્તુ મા ત્વદ્ રાષ્ટ્રમ્ અધિ ભ્રશત્ ॥

ઇહૈવૈધિ માપ ચ્યોષ્ઠાઃ પર્વત ઇવાવિચાચલિઃ ।
ઇન્દ્ર ઇવેહ ધ્રુવસ્ તિષ્ઠેહ રાષ્ટ્રમ્ ઉ ધારય ॥

ઇમમ્ ઇન્દ્રો અદીધરદ્ ધ્રુવં ધ્રુવેણ હવિષા ।
તસ્મૈ સોમો અધિ બ્રવત્ તસ્મા ઉ બ્રહ્મણસ્ પતિઃ ॥

ધ્રુવા દ્યૌર્ ધ્રુવા પૃથિવી ધ્રુવાસઃ પર્વતા ઇમે ।
ધ્રુવં વિશ્વમ્ ઇદં જગદ્ ધ્રુવો રાજા વિશામ્ અયમ્ ॥

ધ્રુવં તે રાજા વરુણો ધ્રુવં દેવો બૃહસ્પતિઃ ।
ધ્રુવં ત ઇન્દ્રશ્ ચાગ્નિશ્ ચ રાષ્ટ્રં ધારયતાં ધ્રુવમ્ ॥

ધ્રુવં ધ્રુવેણ હવિષાભિ સોમમ્ મૃશામસિ ।
અથો ત ઇન્દ્રઃ કેવલીર્ વિશો બલિહૃતસ્ કરત્ ॥