Rig Veda · Chapter 10.141

agne acchā vadeha naḥ pratyaṅ naḥ sumanā bhava |
pra no yaccha viśas pate dhanadā asi nas tvam ||

pra no yacchatv aryamā pra bhagaḥ pra bṛhaspatiḥ |
pra devāḥ prota sūnṛtā rāyo devī dadātu naḥ ||

somaṁ rājānam avase 'gniṁ gīrbhir havāmahe |
ādityān viṣṇuṁ sūryam brahmāṇaṁ ca bṛhaspatim ||

indravāyū bṛhaspatiṁ suhaveha havāmahe |
yathā naḥ sarva ij janaḥ saṁgatyāṁ sumanā asat ||

aryamaṇam bṛhaspatim indraṁ dānāya codaya |
vātaṁ viṣṇuṁ sarasvatīṁ savitāraṁ ca vājinam ||

tvaṁ no agne agnibhir brahma yajñaṁ ca vardhaya |
tvaṁ no devatātaye rāyo dānāya codaya ||